Në një periudhë kur penalltitë janë shpeshtuar në Kupën e Botës për shkak të rishikimit të situatave, Zvicra mund të mbështetet në Yann Sommerin.
Lista e lojtarëve të cilëve ua ka pritur penalltitë portieri i Zvicrës në dy vjetët e fundit në ndeshje garuese është impresive: Kylian Mbappe, Sergio Ramos dy herë, Jorginho, Rodri Hernandez, Tomas Soucek.
Pritja e gjuajtjes së Mbappes ishte momenti më i mirë për Sommerin. Ishte triumfi në penallti ndaj kampiones së botës, Francës, në 1/8 e finales së Kampionatit Evropian, vitin e kaluar.
Penalltia e pritur ndaj Jorginhos është arsyeja pse Zvicra do të udhëtojë në Katar dhe Italia do të qëndrojë në shtëpi. Sommer e kuptoi mesfushorin që ka teknikë të ngadalshme dhe kërcim pak para ekzekutimit të penalltisë, në ndeshjen kualifikuese që përfundoi 0:0.
Dy muaj më vonë në Romë, Jorginho e ndryshoi stilin dhe nga penalltia e minutës së 90-të gjuajti mbi portën e Sommerit. Ndeshja u mbyll 1:1 duke i mundësuar Zvicrës ta fitonte grupin dhe duke e dërguar Italinë në plejof, ku u mposht.
Edhe
Grupi G: Zvicra ka Xhakën e Shaqirin, por edhe lojtarë të tjerë prej të cilëve pret shumë
Televizioni zviceran e pasqyroi krenarinë shtetërore në Sommerin, kur ai priti gjuajtjen e Soucekut në shtator, në ndeshjen e Ligës së Kombeve.
“Yann është vrasësi numër 1 i penalltive në futbollin evropian”, kishte thënë komentatori.
Një rekord prej 29 penalltive ishin akorduar në Kupën e Botës 2018, ku rishikimet e videove nga gjyqtarët bën që të lëshohen pak incidente. Numri më i madh në të kaluarën ishte 18 në një Kupë të Botës me 32 ekipe.
Për Sommerin do të jetë paraqitja e tretë në Kupë të Botës dhe e dyta si portier i parë. Ai ka zhvilluar 76 ndeshje për Zvicrën.
Sommer, i cili do të jetë 34-vjeçar një ditë para finales së Kupës së Botës, e nisi karrierën te Baseli, por ai po e kalon sezonin e nëntë te klubi gjerman, Borussia Moenchengladbach.
Përgatitjet e tij për Katar janë ndërprerë nga një lëndim në nyjën e këmbës së majtë, të pësuar më 18 tetor.
Përzgjedhësi i ri
Edhe
Zvicra u përgatit për penallti në një seminar
Murat Yakin u emërua përzgjedhës në mesin e kualifikimeve në gusht të vitit 2021, kur ai ishte duke e udhëhequr klubin e rangut të dytë të futbollit zviceran, Schaffhausen.
Paraardhësi i tij, Vladimir Petkoviq, pasi shkoi deri në çerekfinale të “Euro 2020”, u prezantua te klubi francez, Bordeaux.
Brenda disa javësh Yakini e udhëhoqi Zvicrën drejt barazimeve ndaj kampiones së Evropës, Italisë – rezultate të cilat i mundësuan kalimin direkt në Kupë të Botës si fituese e grupit.
Yakini luajti 49 ndeshje për Zvicrën si qendërmbrojtës dhe udhëhoqi Baselin drejt dy titujve të ligës.
Sulmuesit e rinj
Zvicra është stabile në mbrojtje me Manuel Akanjin e Manchester Cityt dhe duket e rrezikshme në sulm, me dy sulmues të rinj që kanë pasur sezon impresiv – Breel Embolo dhe Noah Okafor.
Në moshën 25-vjeçare Embolo po hyn drejt turneut të katërt madhor dhe ndoshta të parin si zgjedhje e parë në sulm. Ai shënoi golin e fitores kundër Spanjës dhe Republikës së Çekisë në ndeshjet e shtatorit në Ligën e Kombeve dhe shpejt është përshtatur në klubin francez Monaco, pasi u largua nga Moenchengladbachu.
Edhe
Yakini thotë se zëvendësimet e duhura ishin çelësi i suksesit
Okafori shënoi në tri ndeshje rresht në Ligën e Kampionëve për skuadrën austriake, Salzburg.
Me lidhje familjare nga Kameruni dhe Nigeria respektivisht, Embolo dhe Okafori shfaqin rrënjët e ndryshme në skuadrën e Zvicrës.
