UEFA ka konfirmuar se rregulli për golin si mysafir do të hiqet nga garat evropiane, me ndryshimin që do të hyjë në fuqi nga nisja e sezonit 2021-2022.
Goli si mysafir është përdorur për gjysmë shekulli, por më s’do të vlejë për ndeshjet me eliminim direkt në garat për klube në UEFA, përfshirë Ligën e Kampionëve dhe Ligën e Evropës.
Goli si mysafir ishte përcaktues në ndeshjet me vajtje-ardhje e në të cilat ekipet përfundonin ndeshjet me rezultat të barabartë si rezultat të përgjithshëm. Ekipi që shënonte më shumë gola si mysafir, kualifikohej në raundin e ardhshëm.
Në njoftimin e fundit të UEFA-s bëhet e ditur se vendimi ka ardhur duke u bazuar në rekomandimin për Komitetin e Garave për Klube të UEFA-s.
