Kupa e Botës mund të zhvillohet në çdo dy vjet

FIFA është duke e shqyrtuar mundësinë që Kupën e Botës në konkurrencën e meshkujve dhe të femrave ta organizojë në çdo dy vjet, dhe jo në çdo katër vjet siç është aktualisht.

Propozimi i Federatës së Futbollit të Arabisë Saudite mori mbështetje në kongresin vjetor të FIFA-s.

“Ne besojmë se e ardhmja e futbollit është në një moment kritik”, ka thënë presidenti i futbollit të Arabisë Saudite, Yasser Al-Misehal.

“Shumë probleme me të cilat futbolli është përballur, janë përkeqësuar edhe më shumë me pandeminë që ende po vazhdon”, ka thënë Al-Misehal.

Presidenti i FIFA-s, Gianni Infantino, e ka quajtur këtë si “propozim të detajuar”, dhe 166 federata votuan në favor, 22 prej tyre kundër.

Kupa e Botës në konkurrencën e meshkujve është mbajtur çdo katër vjet qëkur u inaugurua në vitin 1930. Nuk u zhvillua në vitet 1942 dhe 1946 për shkak të Luftës së Dytë Botërore.

Edhe Sport 27 dhj 2021 Mbappe kundër idesë që Botërori të mbahet çdo dy vjet

Botërori i femrave po ashtu është mbajtur çdo katër vjet, qëkur filloi në vitin 1991.

Kjo mund të ndikojë në garat tjera ndërkombëtare, si Kampionati Evropian, i cili po ashtu mbahet në çdo katër vjet.