Salomon Kalou është suspenduar të hënën pas publikimit të një video, që është vlerësuar skandaloze.
Të hënën është bërë e ditur se dhjetë persona të klubeve të Bundesligës dhe Bundesligës 2 janë testuar pozitiv për koronavirus, në valën e fundit të testimeve. Por kjo me gjasë nuk i ka interesuar shumë futbollistit të Hertha Berlinit, Salomon Kalou. Po të hënën ai ka publikuar një video të tij në kompleksin stërvitor të Herthas, ku injorohet distancimi social.
Ish-futbollisti i Chelseat, Kalou është parë duke shtrënguar duart me bashkëlojtarët e Herthas dhe ka ndërprerë kontrollimin mjekësor të një futbollisti tjetër. 34-vjeçari nga Bregu i Fildishtë ka fshirë videon më pas, por dëmi i madh është shkaktuar. Madje ka pasur vlerësime se videoja e tij vë në dyshim planin për vazhdim të Bundesligës gjermane.
Pamja është vlerësuar e papranueshme nga Liga Gjermane e Futbollit, që po punon shumë për rifillim të kampionatit më vonë këtë muaj.
Pas Ligës ka reaguar edhe Hertha që e ka suspenduar futbollistin me efekt të menjëhershëm.
“Me këtë video, Salomon Kalou jo vetëm që ka shkaktuar dëm të madh për Herthan, por mbi të gjitha në kohën e diskutimit lidhur me rifillim të kampionatit, ka dhënë përshtypje që lojtarët nuk e marrin koronavirusin shumë seriozisht”, ka thënë Michael Preetz, menaxher i Herthës.
Edhe
Bundesliga po lufton ta përfundojë sezonin pas shpërthimit të virusit
Futbollisti i pakujdesshëm të paktën ka kërkuar falje për incidentin.
“Më vjen keq nëse kam dhënë përshtypje që nuk po e marr koronavirusin shumë seriozisht. Nuk kam menduar vërtetë, ndërsa unë isha i lumtur që testet tona ishin negative”.
