Federata e Futbollit të Kosovës ka dënuar me ashpërsi incidentin dhe fyerjen e rëndë të natyrës shoviniste që ndodhi në stadiumin “Karaiskakis”, në ndeshjen e kampionatit grek mes Olympiacosit dhe Arisit, mbrëmjen e kaluar, ndërsa janë shprehur të indinjuar me heshtjen e Federatës Greke të Futbollit.
Pankarta “Kosova është Serbi” dhe cilësimi si “heronj” i tre sulmuesve të armatosur që vdiqën gjatë sulmit në Banjskë të Zveçanit të dielën u shfaqën në ndeshjen e vlefshme për kampionatin grek. Gjatë aksionit, u vra edhe rreshteri i Policisë së Kosovës, Afrim Bunjaku.
“Shfaqja e pankartave kundër Kosovës dhe lavdërimi i grupit të terroristëve që pak ditë më parë kryen agresion ndaj shtetit të Kosovës, sipas FFK-së, është një shkelje e rëndë e vlerave të futbollit dhe shprehje e gjuhës së urrejtjes mes popujve. Ky incident është i papranueshëm dhe nuk ka vend në botën e futbollit”, thuhet në reagimin e FFK-së”, thuhet në reagimin e FFK-së.
“Ne jemi të vetëdijshëm për lidhjen e fuqishme të grupit të tifozëve të Olympiakosit me grupet radikale të tifozëve në Serbi, dhe për faktin se disa prej tyre janë serbë të infiltruar në këtë grup. Megjithatë, jemi të indinjuar nga mungesa e reagimit të Federatës Greke të Futbollit për t’u përballur me këtë situatë. Lejimi i këtyre pankartave fashiste e raciste në tribunat prapa portës gjatë gjithë ndeshjes është një mospërgjegjësi që nuk mund të tolerohet”, vijon reagimi i FFK-së.
Kosova e konsideron Greqinë si një shtet mik dhe vlerëson qasjen e saj pozitive karshi shtetit tonë në marrëdhëniet ndërkombëtare, thuhet në reagimin e Federatës.
Edhe
FFK-ja dënon ashpër thirrjet kundër Kosovës
“Me këtë qasje pozitive, kërkojmë nga autoritetet e futbollit në Greqi të jenë të kujdesshme ndaj rasteve të tilla, të ndjekin me përgjegjësi protokollin e UEFA-s dhe të ndëshkojnë incidentet e tilla në mënyrë adekuate. Federata e Futbollit e Kosovës do të vazhdojë të ndërtojë ura miqësie dhe bashkëpunimi në futboll dhe nuk do të lejojë që të ashtuquajturit tifozë ta keqpërdorin këtë sport me ngjyra raciste”, vijon reagimi i tyre.
FFK-ja ka kërkuar nga UEFA që të angazhohet edhe më fuqishëm në luftën kundër diskriminimit në të gjitha stadiumet dhe të sigurojë që futbolli të mbetet një burim argëtimi dhe bashkëpunimi për të gjithë, “duke ndihmuar kësisoj në mbrojtjen e vlerave ndërmjet popujve”.
