Përzgjedhësi i Kosovës, Bernard Challandes, sot zhvillon stërvitjen e tretë të Përfaqësueses së Kosovës përpara ndeshjes me Madagaskarin më 24 mars në Francë.
Pas këtyre stërvitjeve, Challandes ka krijuar përshtypjet e para për ekipin, duke thënë se ka individë shumë të talentuar, me të cilët synon të krijojë ekip, transmeton Koha.net.
“Përfaqësuesja ka lojtarë të talentuar individualë, ka lojtarë që dinë të luajnë futboll. Puna ime është që prej këtyre individëve të krijoj një ekip – një ekip që para së gjithash, bile edhe përpara të të luajturit mirë, luan me zemër, luan për fitore, ka kompaktësi, lufton për Kosovën. Një ekip që thotë ‘unë jam Kosova’ dhe do të vrapojë, do të luftojë, do ta marr topin, do të luftojë edhe më shumë, për fitore”, shprehet ai.
Ai më tutje ka shtuar se, “unë i kam shikuar të gjitha ndeshjet e Kosovës gjatë kualifikimeve për Kupën e Botës. Ajo që kam parë është se lojtarët gjatë kualifikimeve e kanë bartur fanellën e Kosovës, kanë luajtur futboll, kanë luajtur korrekt dhe kaq, asgjë më tepër. Por tani jemi në një nivel tjetër, pra si të thuash, duhet të fillojmë të ndërtojmë katin e dytë. Unë dua të krijoj një ekip që të funksionojë si një familje, që nuk dorëzohet, që thotë ‘unë nuk do të lejoj që Kosova të humbë, të marrë 24 gola’. Kjo është e rëndësishme tani, të krijojmë një mentalitet fituesi”.
Sa i përket ndeshjes miqësore me Madagaskarin, Challandes ka deklaruar se nuk do të jetë ndeshje e lehtë.
“Kjo nuk do të jetë një ndeshje e lehtë. Them se ne as nuk duhet e as nuk jemi në pozitë për ta nënçmuar asnjë ekip. Secili ekip që vihet përballë nesh është një ekip që e meriton respektin më të madh. Madagaskari dje ka luajtur një lojë shumë të mirë kundër Togos. Kam qenë i befasuar me cilësinë e lojës. Ne ndoshta mendojmë që ai është një vend i vogël por ka një ekip shumë, shumë të mirë. Ka lojtarë që luajnë në Francë, në Belgjikë dhe gjithkah nëpër botë, një ekip që ka arritur deri në fazën finale të Kupës së Afrikës dhe kjo nuk është e lehtë. Ne duhet të bëjmë një lojë shumë të mirë për të pasur sukses”, thotë ai.
Edhe
Challandes thotë se Kosova është dashur ta mposhtë Gjeorgjinë
Sot Përfaqësuesja e Kosovës e zhvillon stërvitjen e tretë. Ndeshja me Madagaskarin zhvillohet të shtunën, më 24 mars.
Madagaskari dje ka luajtur kundër Togos, ndeshje e cila ka përfunduar me barazim.
