Shqipëria fiton grupin, barazon pa gola në ndeshjen festive

Shqipëria e ka fituar Grupin E të kualifikimeve për Euro 2024. Të hënën mbrëma në “Air Albania” në Tiranë, Shqipëria barazoi pa gola me Ishujt Faroe në ndeshjen e fundit të ciklit eliminator për Evropianin në Gjermani. Barazimi u ka mjaftuar kuqezinjve për ta fituar grupin. Shqipëria përfundoi me 15 pikë nga tetë ndeshje. 15 pikë i ka edhe Çekia në pozitën e dytë. Edhe Çekia u kualifikua në Euro 2024. Ndeshja e së hënës ishte edhe festive.

U festua kualifikimi në Evropian, i siguruar të premten në Moldavi. Atmosfera në stadiumin e stërmbushur me shikues ishte madhështore. Por paraqitja në fushë nuk ishte në nivel të atmosferës në tribuna. Shqipëria nuk shkëlqeu në fushë, por megjithatë krijoi raste shënimi që nuk i konkretizoi. Nedim Bajrami gjuajti rrezikshëm në minutën e 36-të, por portieri i Ishujve Faroe intervenoi me sukses.

Në minutat shtesë të pjesës së parë provuan Myrto Uzuni e Mirlind Daku, por portieri mysafir sërish nuk u mposht. Daku madje ishte përballë portierit, por nuk e mposhti atë. Në minutën e 67-të, Jasir Asani gjuajti nga zona, por topi u bllokua nga një mbrojtës i Ishujve Faroe. Kristjan Asllani nuk ishte i saktë në minutën e 72-të. Rastet e veta i kishte edhe përfaqësuesja e Ishujve Faroe, por pa rrezikuar seriozisht portën e Thomas Strakoshës. Shqipëria i kishte gjithsej tetë raste, ndërsa kishte katër goditje në kornizë të portës. Ndërkohë Ishujt Faroe i kishin nëntë raste, por asnjë goditje në kornizë të portës. Shqipëria nuk shkëlqeu në ndeshjen festive, por megjithatë e përmbylli denjësisht një cikël të suksesshëm kualifikues.

Për herë të dytë Kombëtarja shqiptare do të jetë në Evropian. Kundërshtarët do t’i mësojë më 2 dhjetor, ndërsa në short do të jetë në vazon e dytë. Këtë ia mundëson vendi i parë në grup.

Shqipëria e Ishujt Faroe po barazojnë pa gola pas pjesës së parë të ndeshjes në “Air Albania” në Tiranë. Atmosfera është e zjarrtë, por loja jo në nivelin e saj. Në pjesën e parë kuqezinjtë kishin tri raste shënimi. Nedim Bajrami gjuajti bukur nga distanca në minutën e 36-të, por portieri i Ishujve Faroe ndërhyri me sukses.

Në minutat shtesë fillimisht provoi Myrto Uzuni, ndërsa Mirlin Daku lëshoi rast të artë më pas.

Ka nisur ndeshja mes Shqipërisë dhe Ishujve Faroe. Në atmosferë madhështore në “Air Albania”, Shqipëria e luan ndeshjen e fundit kualifikuese për Euro 2024.

Stadiumi në Tiranë është i stërmbushur me shikues, ndërsa atmosfera e zjarrtë.

© KOHA. Të gjitha të drejtat janë të rezervuara.