Trajneri i Dinamo Zagrebit, Sergej Jakiroviq, ka telashe të mëdha para udhëtimit në Prishtinë. Gjiganti kroat i futbollit të enjten prej orës 18:45 në “Fadil Vokrri” luan me Ballkanin e Suharekës në kuadër të fazës grupore të Ligës së Konferencës.
Dinamo në fundjavë e humbi derbin e zjarrtë me Hajdukun në Split, ndërsa aktualisht është “spital në fund të qytetit”. Kështu ka shkruar të martën gazeta e madhe kroate “Sportske Novosti”.
Trajneri Jakiroviq për ndeshjen ndaj Ballkanit nuk mund të llogarisë në Bruno Petkoviqin, Stefan Ristovskin dhe Dario Shpikiqin. Të tre janë të lënduar. I sëmurë është Robert Lubiçiq, ndërsa ndaj Hajdukut goditje të forta në gju pësuan Martin Baturina dhe Josip Drmiq. Ndonëse te Dinamo shpresojnë se Lubiçiq, Baturina dhe Drmiq do të jenë gati për ndeshjen në Prishtinë, aktualisht kjo nuk mund të garantohet 100 për qind.
Sipas SN-së, nëse kjo treshe nuk ia del, Dinamo do të jetë në telashe të mëdha. Te Dinamo mezi presin afatin kalimtar të dimrit. Priten përforcime të mëdha.
“Më duhet të paktën gjysmë viti dhe një afat kalimtar për të rregulluar gjithçka”, ka thënë trajneri Jakiroviq.
Dinamo ka shitur tre reprezentuesit e Kroacisë, Dominik Livakoviq, Josip Shutalo dhe Luka Ivanushec. Tani është pa Petkoviqin dhe momentalisht nuk e ka në dispozicion asnjë reprezentues të Kroacisë A.
Kjo është situatë e re për kampionin e Kroacisë.
Sipas SN-së, Dinamo ka pasur afat të keq kalimtar të verës. Mori tre lojtarë që nuk po luajnë fare për skuadrën dhe që potenciali i tyre nuk është bindës.
Ndonëse me telashe, Dinamo mbetet favorite ndaj Ballkanit. Në xhiron e parë të fazës grupore të Ligës së Konferencës, Dinamo fitoi 5:1 ndaj Astanas. Ballkani humbi 1:0 nga Viktoria Plzeni.
© KOHA. Të gjitha të drejtat janë të rezervuara.
