Xhudistët elitarë të Kosovës ka disa vjet që ushtrojnë në Qendrën Nacionale në Pejë. Aktualisht Qendra Nacionale përbëhet nga një sallë e bukur dhe e kompletuar për stërvitje të xhudos, në të cilën janë edhe disa zyra dhe hapësira përcjellëse.
Por pas disa vjetësh Qendra Nacionale do të jetë kompleks i kompletuar sportiv. Për ta kompletuar Qendrën Nacionale të Xhudos në Pejë, Qeveria e Kosovës i ka ndarë 5.5 milionë euro.
“Me vendimin përfundimtar të Qeverisë së Republikës së Kosovës është përmbyllur procedura e shpronësimit për zgjerimin e Qendrës Nacionale të Xhudos në Pejë...Projekti tashmë është hartuar, pra e kemi projektin zbatues për zgjerimin e këtij kompleksi sportiv shumë të rëndësishëm”, ka thënë ministri i Kulturës, Rinisë dhe Sportit, Hajrulla Çeku.
Ai ka thënë se me miratimin e vendimit për shpronësim fillon ndërtimi i “qendrës së parë ndërkombëtare për kampe trajnimi në Kosovë”.
Kompleksi, ndër të tjera, do të përmbajë palestrën sportive, sallën, zhveshtoret dhe tualetet, një tribunë për 700 shikues, hapësirën e duhur për media, 52 dhoma për akomodim dhe bujtina shtesë, objektin me pishina dhe salla fitnesi.
Në këtë kompleks planifikohet të mbahen garat e xhudos në Lojërat Mesdhetare që mbahen në Kosovë në vitin 2030.
Xhudistët e Kosovës ka kohë që shquhen për suksese kulmore ndërkombëtare. Në xhudo Kosova i ka tri medalje të arta olimpike. Ka edhe shumë medalje botërore e evropiane. Me hapjen e Qendrës Nacionale të Xhudos organizimi i këtij sporti në vend ka kaluar në nivel më të lartë. Me kompletimin e kësaj qendre Kosova do të bëhet destinacion i rëndësishëm i xhudos në Evropë.
“Ëndrra po bëhet realitet. Vendi ku farkohen medaljet e arta evropiane, botërore e olimpike po bëhet me kushtet më optimale për stërvitje elitare”, ka shkruar trajneri i Kosovës në xhudo, Driton Kuka.
Ai është më meritori për rritjen e jashtëzakonshme të xhudos në Kosovë.
© KOHA. Të gjitha të drejtat janë të rezervuara.
