Dikur gjigant i futbollit evropian, Ajaxi tani është i zhytur në një nga krizat më të thella në historinë 123-vjeçare. Klubi është i 14-ti në ligën holandeze, zyrtarët e lartë janë të shkarkuar dhe tifozët po krijojnë trazira.
“Klubi është në flakë”, ishte titulli i shkrimit në sajtin zyrtar të tifozëve të Ajaxit, të hënën, duke përshkruar ndërprerjen e derbit ndaj rivalit të madh, Feyenoordit, si “pikën më të ulët në krizën që ka kapluar klubin”.
Ajaxi pranoi tre gola në një paraqitje të dobët në pjesën e parë, të dielën. Kjo bëri që tifozët e klubit të hedhin fishekzjarrë në fushë duke mos i lënë arbitrit zgjidhje tjetër veçse të ndërpresë ndeshjen. Ndeshja do të vazhdojë të mërkurën, me dyer të mbyllura, prej minutës së 55-të.
Skena të shëmtuara pasuan në Amsterdam, me tifozët që thyen dyert dhe u përleshën me forcat e policisë që gjuanin me gaz lotsjellës. Ishte një kapitull i trishtuar i një klubi me histori të lavdishme e të pakrahasueshme në futbollin holandez. Tridhjetë e gjashtë herë fitues i titullit holandez dhe katër herë kampion i Evropës, Ajaxi do të shoqërohet gjithmonë me Johan Cruyffin, emrin e të cilit e ka stadiumi që mbajti peshën e zhgënjimit të tifozëve të dielën. Vetëm një fitore dhe dy barazime e kanë lënë Ajaxin në vendin e 14-të në Eredivisie, tashmë 10 pikë larg PSV Eindhovenit në krye të tabelës. Situatës së vështirë të Ajaxit nuk i ndihmon fare as fakti që Feyenoord është gjithashtu i pamposhtur deri më tani.
“Taktikisht për të qeshur”, ishte titulli i ballinës në gazetën e Amsterdamit “Het Parool”. Kjo gazetë ka shkruar se disa taktika mbrojtëse të Ajaxit kundër Feyenoord ishin “gjëra që nuk i shihni as në ligat lokale, të dielave në mëngjes”.
Veçanërisht i turpshëm ishte goli i tretë i Feyenoordit, kur një tollovi e krijuar në mbrojtje e lejoi Santiago Gimenezin të shkonte drejt zonës pa u penguar nga askush, përpara se të asistonte për Igor Paixaon që mposhti portierin Jay Gorter.
E përditshmja NRC shkroi se ndeshja “simbolizonte krizën ekzistenciale në të cilën ndodhet Ajaxi”.
Në ndeshjen e parë të fazës së grupeve të Ligës së Evropës, javën e shkuar, Ajaxi nxori një barazim kundër Marseillet, një ekip tjetër që po përballet me krizë të madhe. Mirëpo Ajaxin e pret një mision i vështirë për të avancuar nga grupi, pjesë e të cilit është edhe Brightoni që po shkëlqen këtë edicion në Premier League.
Tymi mezi ishte larguar nga tribuna kur një tjetër deklaratë e klubit tronditi tifozët - Ajaxi kishte ndarë rrugët me drejtorin Sven Mislintat “me efekt të menjëhershëm”.
“Raportet e dhimbshme po vijnë me shpejtësi”, tha klubi i tifozëve, duke shtuar se “ka qartësisht trazira në klub, jo vetëm në fushë, por edhe në anën e menaxhimit”.
Mislintat ishte nën hetim të jashtëm për një konflikt të mundshëm interesi për një transferim të minutës së fundit prej tetë milionë eurosh në verë. Klubi mohoi se shkarkimi kishte ndonjë lidhje me hetimin, duke përmendur “mungesën e mbështetjes së gjerë brenda organizatës” si arsye e vendimit. Por edhe vetë njoftimi ishte shumë diskutabil. Deklarata fillestare u zëvendësua me nxitim me një falënderim për “përpjekjet e jashtëzakonshme” të drejtorit Mislintat gjatë qëndrimit të tij katërmujor në Ajax.
Shtypi holandez ka qenë plot me raporte për një luftë për pushtet në krye të klubit. Mislintat me sa duket hyri në terren ndërsa lojtarët po përgatiteshin për ndeshjen me Feyenoordin. Kishte raporte se ishte dita vendimtare dhe se trajneri Maurice Steijn mund të shkarkohej nëse Ajax humbte derbin e njohur si “Klassieker”.
Në fund ishte vetë Mislintat ai që humbi punën, por ka një presion të madh mbi trajnerin Steijn për t'i kthyer gjërat.
“Është natyrisht një situatë e vështirë dhe shumë e errët”, pranoi trajneri.
Tashmë ka spekulime se kush mund ta zëvendësojë atë. Legjenda e sëmurë e Ajaxit, Louis van Gaal e ka përjashtuar veten, duke thënë se shëndeti i tij ka prioritet. Drejtori ekzekutiv i përkohshëm i Ajaxit, Jan van Halst, gjithashtu objektiv i zemërimit të tifozëve, pranoi se klubi është në një krizë të thellë.
“Është një periudhë shumë e vështirë dhe nuk është aspak lehtë t’i kthejmë gjërat siç kanë qenë”, shtoi ai.
Eksperti holandez i futbollit, Jaap Stalenburg, tha se te Ajaxi është një kaos i vërtetë.
“Po luftojnë kudo. Në fushë, jashtë fushës. Në Ajax kanë nevojë për një diktator, një udhëheqës të fortë që të vijë dhe t’i zgjidhë gjërat”, u shpreh Stalenburg.
© KOHA. Të gjitha të drejtat janë të rezervuara.
