Kryetari i Komitetit Olimpik të Kosovës (KOK), Ismet Krasniqi, ka thënë se duhet të mbahet një tjetër kuvend i jashtëzakonshëm zgjedhor në Federatën e Karatesë së Kosovës. I pari i KOK-ut në një intervistë për KosovaPress ka thënë se zgjedhjet e reja në FKK duhet të mbahen brenda 45 ditëve. Krasniqi ka theksuar se Kuvendin duhet ta thërrasë sekretariati i Federatës.
Karateja kosovare ka javë që është ndarë në dy grupime. Dhe në zhvillimet rreth dy grupeve - atij të udhëhequr nga Avni Gashi dhe atij që përfaqësohet nga Nazmi Gashi e Besart Baruti - është përfshirë edhe më fuqishëm Komiteti Olimpik i Kosovës.
Në fakt ka plot telashe të brendshme të federatave në të cilat KOK-u nuk përfshihet. Për shembull, nuk ishte përfshirë në zhvillimet e shumta në Federatën e Futbollit të Kosovës.
Por ndryshe është gjendja me karatenë, të cilën Krasniqi e ka drejtuar më herët dhe prej së cilës nuk është shkëputur plotësisht.
“Ne jemi duke e vëzhguar nga afër këtë proces, sepse jemi të interesuar t’i mbrojmë anëtarët tanë, secilën federatë. Edhe pse ka pasur keqinformime dhe keqkuptime, ndoshta edhe në gazeta, mirëpo KOK-u e njeh vetëm statutin e një federate. Çdo gjë që shkon jashtë statutit ne nuk e njohim, çdo gjë që shkon me statut, ne patjetër duhet ta njohim. FKK-ja i ka disa probleme dhe besoj që shumë shpejt do t’i zgjidhë me një asamble të radhës ku në bazë të statutit e thërret sekretaria e FKK-së, as kryetari as sekretari, por vetëm zyra. Kështu e thotë statuti dhe besoj se brenda këtyre 45 ditëve, afat të cilin MKRS-ja e ka dhënë të fundit, edhe pse mendoj që jetojmë në shtet demokratik dhe vota është gjithçka dhe atë votë ka të drejtë ta jap secili në bazë të statutit. Votën nuk e përcakton as Komiteti Olimpik i Kosovës, Ministria dhe askush tjetër përveç siç parashihet me statut të një federate”, ka thënë Ismet Krasniqi.
Institucioni që Krasniqi e drejton e kishte pranuar si të rregullt Kuvendin e Jashtëzakonshëm Zgjedhor të mbajtur në korrik, që nxori drejtues të rinj të Federatës, përkatësisht Barutin. Por përfaqësuesit e MKRS-së që monitoruan atë kuvend të jashtëzakonshëm gjetën shkelje të ndryshme. Ndër të tjera, kryetari i zgjedhur në atë kuvend, Besart Baruti, nuk kishte bazë deleguese nga asnjë klub i licencuar, sipas raportit të monitoruesve nga MKRS-ja.
Pas raportit, ministri i MKRS-së, Hajrulla Çeku, aprovoi propozimin e Komisionit Vlerësues për Licencimin e Federatave Sportive për pezullim të licencës së Federatës së Karatesë. Sipas vendimit, veprimet e Federatës së Karatesë janë në kundërshtim me Ligjin për sport, Udhëzimin Administrativ për kushtet, kriteret dhe procedurat e themelimit, licencimit dhe rivlerësimit të federatave, si dhe Statutin e FKK-së.
MKRS-ja kërkoi kuvend të ri të Federatës dhe përcaktoi që në të mund të marrin pjesë vetëm përfaqësuesit e klubeve që janë licencuar. Në rast se Federata nuk e respekton ligjin, MKRS-ja ka kërcënuar se do t’ia tërheqë plotësisht licencën. Licenca është bazike për funksionimin e një federate sportive.
Kështu “gara” vazhdon të jetë shumë e ashpër në mes të grupeve që pretendojnë se janë legjitime për ta udhëhequr Federatën e Karatesë së Kosovës.
Avni Gashi, i cili e vlerëson veten kryetar të FKK-së, ka thirrur kuvend të jashtëzakonshëm për 28 shtator. Ai insiston se Kuvendi duhet të mbahet.
“Për ta kthyer ligjshmërinë në Federatën e Karatesë së Kosovës duhet të mbahet Kuvend jo më larg se 45 ditë, ndryshe do të humbet licenca e cila aktualisht është e pezulluar. Pas 45 ditësh mund të humbet. Rrjedhimisht unë kam ndërmarrë veprimet administrative, kam bërë një thirrje për Kuvend. Ajo thirrje për Kuvend është bërë për të gjitha klubet e Federatës së Karatesë së Kosovës sipas pikës 2.1, e cila thotë ‘klubet e licencuara’, pastaj vjen kriteri tjetër që quhet Statut dhe në Statut ne duhet të bazohemi në klubet që kanë qenë në gara dhe që kanë paguar kotizimin. Andaj ky është filtri i dytë dhe me këtë filtër do të shkohet në Kuvend dhe shpresoj se do të kthehet ligjshmëria”, është shprehur Avni Gashi.
Avni Gashi ka ftuar KOK-un dhe MKRS-në për monitorim të Kuvendit të Jashtëzakonshëm të thirrur për 28 shtator. Por sekretari i përgjithshëm i KOK-ut, Besim Aliti, ka vlerësuar se thirrja e kuvendit të jashtëzakonshëm nga Avni Gashi është në kundërshtim të plotë me Statutin e FKK-së. Aliti ka shkruar se kush mund ta thërrasë kuvendin, duke bërë kështu interpretimin e Statutit të FKK-së.
Antistatutar mbajtjen e një Kuvendi të ri e ka cilësuar Nazmi Gashi.
“MKRS-ja është duke na shtyrë neve, duke na bërë presion, që ne të thërrasim një kuvend antistatutar. Nga kryetari aktual dhe administrata e FKK-së nuk do të lejohet të ftohet një kuvend zgjedhor, që me vetëdije e dimë që po shkelim Statutin. Në këtë lojë dhe sistem ne nuk do të biem në presion, ne do t’i padisim të gjithë aktorët që i kanë rekomanduar ministrit për këto lloj veprimesh. Do të paditen MKRS-ja dhe zyrtarët që në Kuvend kanë prodhuar një raport i cili është i dëmshëm për FKK-në”, ka thënë Nazmi Gashi.
Përplasje të brendshme e goxha të fuqishme në komunitetit të karatesë ka pasur edhe në të kaluarën. Dhe ato vlerësohet se e frenojnë zhvillimin e karatesë. Së fundi karateistët fituan vetëm dy medalje të bronzta në Kampionatin Ballkanik, që u mbajt në Tiranë. Synimet ishin dukshëm më të mëdha.
© KOHA. Të gjitha të drejtat janë të rezervuara.
