Trajneri i Barcelonës, Xavi Hernandez ka folur në prag të ndeshjes që e luan me Mallorcan në kuadër të La Ligas.
Dueli mes Mallorcas dhe Barcelonës, zhvillohet të martën prej orës 21:30 dhe i takon xhiros së shtatë të kampionatit spanjoll. Barça llogaritet favorite në këtë përballje, por Xavi ka pranuar se ekipi i tij nuk do ta ketë aspak të lehtë kundër Mallorcas.
Ai ka thënë se Mallorca luan fort në mbrojtje, ndërsa në sulm mbështetet te Vedat Muriqi. Sulmuesi i Kosovës, ka shënuar dy gola në dy ndeshjet e fundit për Mallorcan, që renditet në pozitën e 16-të në tabelë me 5 pikë. Ndërkohë, Barcelona i prinë La Ligas me 16 pikë dhe do ta kërkojë fitoren e gjashtë këtë edicion ndaj Mallorcas.
“E kemi parasysh shumë mirë që Mallorca është një ekip shumë i vështirë për shkak se ka shumë elemente. Aguirre përgatitet mirë në mbrojtje dhe zakonisht luan me pesë lojtarë, të cilët luajnë direkt me Muriqin në sulm. Është një ndeshje shumë e vështirë sepse kemi të bëjmë me një kundërshtar agresiv”, është shprehur Xavi.
© KOHA. Të gjitha të drejtat janë të rezervuara.
