Ballkanit i mungon fati, pëson 1:0 nga Viktoria Plzeni

Një goditje e devijuar ka vendosur ndeshjen mes Viktoria Plzenit dhe Ballkanit. Skuadra çeke fitoi 1:0 takimin e së enjtes mbrëma, të zhvilluar në “Doosan Arena” në Plzen. Sfida i takoi xhiros së parë të fazës grupore të Ligës së Konferencës.

Në minutën e 73-të, Lukas Kalvach i Plzenit goditi nga distanca. Topi u devijua nga Lumbardh Dellova dhe përfundoi në një kënd që Enea Koliçi e kishte të pamundur ta mbulonte. Skuadra çeke në fakt ka dominuar në fushë, por pa krijuar shumë raste konkrete për shënim.

Ballkani është mbajtur mirë në pjesën e parë, kryesisht falë vendosjes dhe luftës së lojtarëve në fushën e lojës.

Kampioni i Kosovës ka krijuar disa gjysmëraste, ndërsa ishte më konkret vetëm pas pranimit të golit. Në minutën e 83-të, Nazmi Gripshi gjuajti mbi portë në rastin më të mirë në ndeshje të Ballkanit. Në minutën e 86-të, goditje të bukur bëri Qëndrim Zyba.

Por topi shkoi pranë shtyllës. Ballkani për herë të dytë garon në fazën grupore të Ligës së Konferencës.

Është në Grupin C, të cilin e përbëjnë edhe Dinamo Zagrebi dhe Astana. Dinamo fitoi bindshëm ndaj Astanas të enjten. Pikërisht Dinamo është kundërshtare e Ballkanit në ndeshjen e ardhshme. Gjiganti kroat vjen në Kosovë më 5 tetor.

Ndeshja do të luhet në “Fadil Vokrri”. Plzeni ishte favorit në ndeshjen e së enjtes. Kjo skuadër vjet luajti në fazën grupore të Ligës së Kampionëve, ndërsa ka përvojë e të gjatë në gara evropiane. Plzeni është në formë shumë të lartë. Fitorja ndaj Ballkanit ishte e 11-ta rresht e Viktoria Plzenit. Por skuadra suharekase ishte kundërshtare e denjë e Plzenit. Ka dëshmuar që me meritë është për herë të dytë rresht në fazën grupore.

Viktoria Plzeni ka kaluar në epërsi 1:0 ndaj Ballkanit.

Në minutën e 73-të, Kalvach goditi nga distanca, ndërsa topi pas devijimit nga Dellova përfundoi në rrjetë.

Ballkani ka pasur paraqitje të denjë ndaj Viktoria Plzenit në pjesën e parë të takimit në Çeki.

Rezultati pas pjesës së parë është 0:0.

Të dy skuadrat kanë kërkuar golin, por pa krijuar shumë raste.

Enea Koliçi kishte një ndërhyrje vendimtare, ndërsa kampioni kosovar krijoi disa gjysmëraste.

Vikoria Plzeni dhe Ballkani po zhvillojnë ndeshje të fortë në fazën grupore të Ligës së Konferencës.

Pas 20 minutave lojë rezultati mbetet 0:0.

Ndeshja po zhvillohet kryesisht në mesfushë, ndërsa të dy skuadrat po bëjnë përpjekje për të krijuar rastet e para.

© KOHA. Të gjitha të drejtat janë të rezervuara.