Ekipi pak i njohur, Heidenheim, ka dalë në skenë nga askund për të arritur në Bundesligë. Është një sukses i jashtëzakonshëm për një ekip nga qyteti me vetëm 50 mijë banorë në jug të Gjermanisë.
Dy gola në kohën e shtesë i siguruan skuadrës së trajnerit Frank Schmidt kalimin në elitë si kampione e kategorisë së dytë gjermane, të dielën.
Heidenheimi do të jetë skuadra e 57-të që do të luajë në Bundesligë që nga formimi i ligës në vitin 1963. Njëzet vjet më parë po luante në nivelin e pestë si pjesë e Heidenheimer Sportbund, një shoqatë sportive lokale që ka 25 departamente duke përfshirë bejsbollin, boksin, skermën, notin, tenisin dhe gjimnastikën. Klubi aktual i futbollit Heidenheim u formua në vitin 2007, kur u nda nga “Sportbund” si një entitet i pavarur nën kujdesin e ligës gjermane të futbollit.
Schmidt, i cili ka lindur në Heidenheim, mori detyrën e trajnerit po atë vit. Që atëherë ai është bërë trajneri më jetëgjatë në futbollin profesionist gjerman. Si mesfushor mbrojtës, Schmidt kishte ndihmuar Heidenheimin të ngjitej nga niveli i pestë në të katërtin në vitin 2006. Ai më parë bëri 76 paraqitje në divizionin e dytë për Alemannia Aachen dhe Waldhof Mannheim, përpara se të kalonte tri edicionet e fundit të karrierës duke luajtur për klubin e qytetit. Schmidt u emërua trajner i Heidenheimit - fillimisht në bazë të përkohshme - më 17 shtator të vitit 2007. Ai e drejtoi ekipin drejt ngjitjes në divizionin e tretë në vitin 2009, pastaj në divizionin e dytë në vitin 2014, përpara ngjitjes së jashtëzakonshme të së dielës në Bundesligë. Çdo promovim u arrit si kampion i ligës. Në vitin 1994, Schmidt ishte pjesë e ekipit të nivelit të katërt TSV Vestenbergsgreuth që tronditi kampionin gjerman Bayern Munichun duke e mposhtur 1:0 në raundin e parë të Kupës së Gjermanisë. Ai pothuajse mahniti Bayernin përsëri në çerekfinalen e Kupës së Gjermanisë në vitin 2019, kur Heidenheimi u eliminua me një humbje 5:4 në Munih.
Heidenheimi do të ketë më shumë shanse për të shqetësuar fuqinë bavareze edicionin e ardhshëm. Pak kundërshtarë do të shijojnë përballjen me ekipin e palodhur të trajnerit Schmidt.
Goli i fitores që u realizua nga sulmuesi Tim Kleindienst siguroi promovimin të dielën. Kleindienst përfundoi golashënuesi më i mirë i kategorisë së dytë gjermane me 25 gola, ndërsa Jan-Niklas Beste, i cili asitoi në golin e fitores dhe realizoi një tjetër nga penalltia, kontribuoi me 13 asistime dhe 12 gola. Heidenheimi kishte sulmin e dytë më të mirë (67 gola) dhe mbrojtjen e dytë më të mirë (33 gola) në divizion, ku kishte bilancin më të mirë në shtëpi.
“Ne patëm vetëm katër humbje, ishim skuadra më e mirë në shtëpi dhe grumbulluam shumë pikë në ndeshjet në udhëtim”, tha Schmidt. “Ne e merituam plotësisht ngjitjen në Bundesligë”.
Schmidt vlerësoi qëndrimin dhe moralin e lojtarëve të tij për shënimin e dy golave kundër Jahn Regensburgut në xhiron e fundit, për të arritur fitoren që u nevojitej për promovimin automatik.
“FC Heidenheimi ka zhvilluar një mentalitet të jashtëzakonshëm në vitet e fundit dhe këtë e ka dëshmuar në secilën ndeshje”, tha Schmidt.
Trajneri vlerësoi gjithashtu shefin ekzekutiv të klubit, Holger Sanwald, i cili mori detyrën në vitin 1994 kur klubi po bënte gara në nivelin amator.
“Ai mori drejtimin në Landesliga. Nëse ai nuk do të kishte marrë njerëz të duhur afër vetes, kjo nuk do të ishte e mundur. Falë tij ne do të shijojmë Bundesligën edicionin tjetër dhe do të jemi një ekip me mentalitet të pathyeshëm”, shtoi Schmidt.
Ndërkohë, Sanwald veçoi lart trajnerin Schmidt për arritjet e tij.
“Është e papërshkrueshme se çfarë lloj trajneri kemi. Ne nuk mund ta kishim bërë këtë pa të”, tha Sanwald. “Unë i ofroj atij një statujë, ai nuk e dëshiron atë. Unë i ofroj atij një kontratë deri në pension, ai nuk e dëshiron atë. Ky është Franku”.
Schmidt bëri shaka se e hodhi poshtë idenë e statujës, sepse “në një moment dikush do të urinojë mbi të, dhe unë nuk e dua këtë”. / AP
© KOHA. Të gjitha të drejtat janë të rezervuara.
