Dy ndeshje do ta kenë vëmendjen më të madhe në elitën e futbollit të Kosovës në xhiron e fundit të Superligës.
Ndeshje pothuajse miqësore do të luajnë Drenica – Drita, Malisheva – Llapi dhe Gjilani – Ballkani.
Drenica ka rënë nga liga zyrtarisht, ndërsa Drita do të mbetet nënkampione.
Malisheva dhe Llapi kanë siguruar mbijetesën, por do të luajnë për plasman përfundimtar. Drenica ka 23 pikë në vendin e fundit, Drita ka 67 pikë në vendin e dytë, kurse Malisheva e gjashta dhe Llapi i shtati, kanë nga 43 pikë.
Gjilani – Ballkani do të luhet në Suharekë, me marrëveshje të dy klubeve, për shkak të festës që do ta kenë suharekasit, si fitues të titullit të kampionit në këtë edicion. Ballkani në xhiron e kaluar e fitoi titullin e dytë rresht në histori të klubit, por me kërkesë është vendosur që ndeshja e fundit e kampionatit të mos luhet në Gjilan, por në Suharekë.
Dy duelet e vetme, në të cilat do të luhet deri në minutën e fundit, do të jenë Ferizaj – Dukagjini dhe Trepça ’89 – Prishtina.
Ferizaj e Trepça ’89 luftojnë për ta zënë vendin e barazhit, kurse Dukagjini e Prishtina për të përfunduar në pozitën e katërt, që mund të dërgojë në kualifikimet e Ligës së Konferencës.
Aktualisht, Dukagjini është në pozitën e katërt me 50 pikë, dy më shumë se Prishtina që renditet e pesta. Ferizaj në zonën e barazhit ka 38 pikë, ndërsa Trepça ’89 ka 37 pikë dhe zë vendin e parafundit.
Pra, secila skuadër do të luftojë për të marrë pikë në këto ballafaqime, pasi gara ende është e hapur.
Në rast se Ferizaj dhe Trepça ’89 e mbyllin kampionatin me pikë të njëjta, në barazh do të luajë Ferizaj, për shkak se në katër ndeshjet e ndërsjella të këtij edicioni, ka bilanc më të mirë. Ka dy fitore e një humbje, kurse një ballafaqim është mbyllur baras.
Pozita e katërt do të mund të ishte e pavlerë në qoftë se Prishtina fiton në finale të Kupës së Kosovës ndaj Gjilanit. Por Prishtina ka telashe me licencim për momentin. Në rast se Gjilani triumfon në Kupë, në Ligën e Konferencës shkon vendi i katërt.
Finalja e Kupës së Kosovës do të luhet më 5 qershor, në orën 18:00, në stadiumin “Fadil Vokrri”, në Prishtinë.
Të gjitha ndeshjet e xhiros së 36-të në Superligën e Kosovës në futboll do të luhen të dielën dhe që të gjitha nisin në orën 15:00.
© KOHA. Të gjitha të drejtat janë të rezervuara.
