Sport

Ballkani nuk ka opsion tjetër veç fitores ndaj Ferizajt

Skuadrës së Ballkanit i duhen edhe gjashtë pikë nga dy ndeshjet e fundit të këtij edicioni për t’u konfirmuar kampion i Kosovës në futboll, pavarësisht rezultateve të Dritës.

Tri pikët që do ta afrojnë te titulli Ballkani i synon në ndeshjen e xhiros së 35-të, përkatësisht të parafundit. Të shtunën, Ballkani e pret në Suharekë skuadrën e Ferizajt, në ndeshjen që nis në orën 15:00.

Ferizaj ka synime të tjera në dy xhirot e fundit të kampionatit. Por po ashtu synon pikë. Ferizaj po lufton ta sigurojë mbijetesën në Superligë. Aktualisht është në pozitën e tetë, e cila garanton ndeshjen e plejautit. Ferizaj ka 38 pikë, ndërsa Ballkani prin në tabelë me 69 pikë. Drita është e dyta me 67 pikë.

Te Ballkani e dinë se nuk guxojnë të gabojnë në dy ndeshjet e fundit, sidomos ndaj Ferizajt. Drita shpreson në një gabim të ekipit nga Suhareka për të fituar titullin. Ballkani ka dy fitore rresht, të cilat i mundësuan të dal në pozitën e parë.

Ballkani ndaj Ferizajt pret edhe përkrahjen e fuqishme të tifozëve suharekas. Ka njoftuar se hyrja do të jetë falas për ndeshjen e fundit të këtij kampionati në shtëpi. Mbrojtësi i krahut të djathtë, Armend Thaqi, e ka quajtur ndeshjen me Ferizajn si ndeshje të vitit. Ka pranuar se nuk do të jetë lehtë ndaj Ferizajt që ka shfaqur shumë në pranverë.

“Na pret ndeshja e vitit për nga rëndësia, sepse me fitore e ruajmë vendin e parë dhe i afrohemi edhe më shumë titullit të kampionit. Përballë kemi një kundërshtar të vështirë si Ferizaj, ekip që i duhen pikët për mbijetesë. Bazuar në atë që ka treguar Ferizaj deri më tani, e dimë shumë mirë që na pret një ndeshje shumë e vështirë”, u shpreh Thaqi të premten për KOHËN. “Megjithatë, pavarësisht kësaj, synimi ynë mbeten tri pikët në këtë ndeshje për shkak se ne po kërkojmë ta mbrojmë titullin e kampionit. Nuk ka opsion tjetër për ne, sidomos në këtë moment kur jemi liderë dhe janë edhe dy ndeshje deri në fund. Me shumë punë dhe angazhim, besoj në tri pikët e titullit”.

Edhe te Ferizaj e vlerësojnë si tejet të vështirë ndeshjen me Ballkanin, por insistojnë se do të udhëtojnë në Suharekë për rezultat pozitiv. Ferizaj në tri ndeshjet e fundit nuk di për humbje, ku ka shënuar dy fitore dhe ka një barazim.

“Tani dihet se është fundi i kampionatit dhe kanë mbetur edhe dy ndeshje për t’u zhvilluar. Fokusi ynë është te dueli me Ballkanin, pasi jemi përgatitur maksimalisht dhe kemi punuar gjatë tërë javës për këtë ndeshje. Ne e kemi parasysh kualitetin e Ballkanit, por kjo nuk do të thotë se nuk mund të marrim rezultat pozitiv. Besoj se do t’ia dalim pasi një rezultat i tillë do të bënte që edhe më shumë të kemi siguri për mbijetesë”, ka thënë mbrojtësi i Ferizajt, Behar Bardhi.

Ferizaj ka reaguar ndaj Ballkanit, i cili nuk ka garantuar siguri për tifozët mysafirë. Nëpërmjet një njoftimi Ferizaj ka thënë se është befasuar nga përgjigjja negative e Ballkanit edhe pse me kohë e kishte njoftuar për interesimin e tifozëve ferizajas.

Të shtunën zhvillohen të gjitha ndeshjet e xhiros së parafundit.

Drita e pret në shtëpi skuadrën e Malishevës, që është e shtata në tabelë dhe ka dy pikë mbi zonën e plejautit.

Duel tjetër interesant do të jetë ai që luhet në Klinë, ku Dukagjini e pret Trepçën ‘89. Dukagjini është i katërti në tabelë me 47 pikë dhe po synon një vend në garat evropiane për edicionin e ardhshëm, ndërsa 89-shi po lufton për mbijetesë. Ekipi nga Mitrovica është i parafundit në tabelë me 37 pikë, një më pak se Ferizaj që renditet i teti.

Në Podujevë, skuadra e Llapit e pret Gjilanin. Ekipi llapjan nuk di për fitore në gjashtë ndeshjet e fundit, ku ka regjistruar tri humbje e po aq barazime.

Ndërkohë, Prishtina e pret Drenicën që tashmë mund të përgatitet për gara në Ligën e Parë.

Superliga - 35

E shtunë (15:00)

Ballkani – Ferizaj

Drita – Malisheva

Llapi – Gjilani

Prishtina – Drenica

Dukagjini – Trepça ‘89


1. Ballkani 34 19 12 3 60:32 69

2. Drita 34 19 10 5 60:29 67

3. Gjilani 34 13 13 8 32:32 52

4. Dukagjini 34 13 8 13 37:34 47

5. Prishtina 34 11 12 11 41:33 45

6. Llapi 34 11 9 14 40:45 42

7. Malisheva 34 10 10 14 48:50 40

8. Ferizaj 34 9 11 14 29:47 38

9. Trepça ’89 34 9 10 15 43:58 37

10. Drenica 34 6 5 23 25:55 23