Erling Haaland thotë se i pëlqen sfida për t’i përmbushur kërkesat e trajnerit Pep Guardiola, ndërsa Manchester City po lëviz drejt “tripletës” së mundshme në edicionin e parë të sulmuesit norvegjez në Angli.
Haalandi vendosi rekord të ri në Premier League prej 35 golave të shënuar në një edicion. Ai e çoi numrin e golave personal në 51 në të gjitha garat, kundër West Ham Unitedit të mërkurën mbrëma. Fitorja 3:0 e ktheu Cityn në krye të tabelës në Premier League, me një pikë më shumë se Arsenali.
Por City ka një ndeshje më pak të zhvilluar. Skuadra e Guardiolas përballet me Real Madridin në gjysmëfinale të Ligës së Kampionëve më vonë këtë muaj dhe me Manchester Unitedin në finalen e Kupës FA më 3 qershor. City është shpallur disa herë kampion i Anglisë viteve të fundit. Megjithatë nuk kishte pikë qendrore në repartin e sulmit përpara ardhjes së Haalandit. Me ardhjen e tij gjërat kanë ndryshuar shumë te City, që është shndërruar në makineri golash. Edhe sugjerimet se norvegjezi do të kishte vështirësi për t'u përshtatur në sistemin e lojës së trajnerit spanjoll janë harruar prej kohësh.
“Po e shijoj secilën ndeshje me fanellën e Cityt”, tha Haaland kur u pyet për jetën e tij nën urdhrat e ish-trajnerit të Barcelonës dhe Bayern Munichut. “Është vështirë sepse ai është kërkues, por unë mundohen të jap më të mirën nga vetja në fushë. Nëse e bën këtë atëherë nuk ke probleme me Guardiolan. Për mua është kënaqësi dhe më pëlqen shumë të luaj nën urdhrat e Guardiolas. Jam shumë i lumtur që e kam atë si trajner”.
Rekordi i Haalandit do të ishte edhe më madhështor sikur Guardiola të mos e pushonte shpesh sulmuesin 22-vjeçar gjatë këtij edicioni të ngarkuar me ndeshje. Por veprimi i Guardiolas duke e pushuar Haalandin sa herë që ka pasur mundësi i është shpaguar Cityt. Norvegjezi pothuajse nuk është lënduar fare. Kjo është në kontrast me kohën e Haalandit te Borussia Dortmundi kur përgjatë më shumë se dy vjetëve është përballur me lëndime të shumta.
“Potencialisht kanë mbetur edhe nëntë ndeshje deri në fund të këtij edicioni dhe do të mundohem të vazhdoj me këtë ritëm, natyrisht nëse trajneri më aktivizon”, është shprehur Haaland. Ai ka aluduar se ka gjasa që mos të luajë farë në ndeshjen kundër Leeds Unitedit, të shtunën në kuadër të kampionatit anglez, për të qenë i pushuar për duelin e parë ndaj Real Madridit që luhet tri ditë më vonë.
“Unë kam dëshirë të luaj në çdo ndeshje, por nganjëherë duhet pushuar për shkak të orarit të ngarkuar. Jam në formë të mirë dhe kam mentalitetin e duhur për ta ndihmuar Cityn drejt trofeve këtë edicion. Do të fokusohemi në ndeshjet e mbetura dhe do të përpiqemi t’i fitojmë të gjitha”.
I kënaqur me formën e Haalandit ka mbetur edhe Guardiola, i cili ka paralajmëruar rivalët e Manchester Cityt. Sipas Guardiolas, ky është vetëm fillimi për Haalandin. Spanjolli beson se sulmuesi do të thyejë edhe shumë rekorde të tjera me fanellën e Cityt.
“Ai do të shënoj edhe më shumë gola pasi mentaliteti i tij është vetëm të shënojë. Është një lojtar i jashtëzakonshëm dhe kërcënimi më i madh për të gjithë kundërshtarët. Unë pres që Haalandi të vazhdojë me shënimin e golave për të vazhduar me rekordet e tij”, ka thënë Guardiola.
Guardiola ende nuk e ka fituar trofeun e Ligës së Kampionëve pa Lionel Messin. Garën elitare të Evropës në nivel klubesh e pati fituar dy herë kur ishte në krye të Barcelonës dhe sa e kishte në ekip argjentinasin. Duket se Haalandi do të ketë efekt të ngjashëm sikurse Messi, pasi po e shtyn Cityn drejt suksesit të parë në Champions. Ekipi i Guardiolas është vetëm dy ndeshje larg arritjes në finale të kësaj gare, të cilën trajneri spanjoll nuk e ka fituar prej vitit 2011.
“Nuk mund të kemi sukses në Champions nëse ekipi nuk na ofron sulmues efikas dhe tejet cilësor. Pa lojtarë të tillë triumfi nuk është i mundur por tani me Haalandin përpara gjërat kanë ndryshuar”, tha Guardiola.
© KOHA. Të gjitha të drejtat janë të rezervuara.
