City në gjysmëfinale me Realin pasi eliminoi Bayernin

Manchester City i Pep Guardiolës do të luajë në gjysmëfinale të Ligës së Kampionëve. City të mërkurën mbrëma barazoi në udhëtim te Bayern Munichu, dhe nuk e lëshoi epërsinë e krijuar nga ndeshja e parë të cilën e fitoi 3:0.

Bayerni e City barazuan 1:1 në ndeshjen kthyese të çerekfinales, që u zhvillua në “Allianz Arena”. Erling Haaland e pati mundësinë të shënonte nga penalltia në pjesën e parë, por dështoi përballë portierit Yann Sommer, duke gjuajtur lartë mbi portë.

Ishte pikërisht Haaland që nuk gaboi në minutën e 57-të pas një kundërsulmi të shpejtë.

Ai e kaloi Dayot Upamecanon dhe e mposhti Sommerin për golin e 12-të të edicionit në “Champions”. Joshua Kimmich në minutën e 83-të shënoi nga penalltia për barazimin e rezultatit, që ishte përfundimtar në këtë ballafaqim. City e Reali takohen në gjysmëfinalen e parë më 9 maj. Ndeshja kthyese e gjysmëfinales luhet më 16 maj. Finalja e këtij edicioni të Ligës së Kampionëve është vendosur të luhet në stadiumin “Ataturk Olympic Stadium” në Stamboll.

Bayerni ka barazuar rezultatin në duelin kundër Manchester Cityt.

Nga penalltia golin për Bayernin e shënoi Joshua Kimmich.

Ai mposhti portierin Ederson në minutën e 83-të.

Manchester City ka shënuar golin e epërsisë ndaj Bayern Munichut.

Shënues i golit ishte norvegjezi Erling Haaland, i cili në pjesën e parë humbi penalltinë.

Haalandi realizoi golin e 12-të të edicionit në Ligën e Kampionëve, pasi e kaloi Dayot Upamecanon, e më pas nuk pati vështirësi përballë portierit Yann Sommer në minutën e 57-të të ndeshjes.

Bayern Munichu dhe Manchester City kanë shkuar në pushim mes pjesëve me rezultat të barabartë, 0:0. 
City ka epëris prej tri golave nga ndeshja e parë në Angli. 
Fitoi me rezultatin 3:0. 

Ndërkohë, në duelin kthyese në Gjermani, Bayerni pavarësisht rasteve që pati, nuk shënoi. 
Rastin më të mirë në 45 minutat e para të ndeshjes e pati Erling Haaland i Cityt.

Sulmuesi norvegjez dështoi të shënonte nga penalltia në minutën e 37-të. 
Ai gjuajti mbi portë.

Erling Haaland ka humbur mundësinë ta kalonte Cityn në epërsi ndaj Bayernit në “Allianz Arena”.

Haalandi nuk shënoi nga 11-të metra në minutën e 37-të.

Ai gjuajti mbi portë.

Joao Cancelo do të jetë titullar te Bayern Munichu për ndeshjen ndaj ish-skuadrës së tij Manchester City. Bayerni ka bërë dy ndryshime nga dueli i parë i çerekfinales së Ligës së Kampionëve, ku City triumfoi 3:0. Cancelo dhe golashënuesi më i mirë i skuadrës, Eric Maxim Choupo-Moting janë titullar.

Choupo-Moting është kthyer nga lëndimi i gjurit, ndërsa zëvendësohen me Alphonso Daviesin dhe Serge Gnabryn. Sadio Mane është kthyer nga suspendimi i një ndeshjeje nga klubi, pas përleshjes që pati me Sanen. Mane, megjithatë, është në bankën rezervë.

Formacioni i Bayernit: Sommer, Cancelo, De Ligt, Upamecano, Pavard, Goretzka, Kimmich, Coman, Musiala, Sane, Choupo-Moting.

Manchester City do ta ketë formacionin e njëjtë nga dueli i javës së kaluar. Tetë nga 11-të që do të luajnë titullar sonte, ishin të pranishëm edhe në fitoren 3:1 ndaj Leicester Cityt në Premier League. Nathan Ake, Manuel Akanji dhe Ilkay Gundogan janë kthyer në formacion Phil Foden është në bankën rezervë pas një operimi që e pati. Formacioni i Cityt: Ederson, Ake, Dias, Akanji, Rodri, Stones, Grealish, Gundogan, De Bruyne, Silva, Haaland.

© KOHA. Të gjitha të drejtat janë të rezervuara.