Sport

Retegui, pika e ndritshme tek Italia që sërish nuk arrin të shkëlqejë

Mateo Retegui

Debutimi mbresëlënës i Mateo Reteguit për Italinë i dha njëfarë shkëlqimi asaj që në thelb ishte një paraqitje e zbehtë nga kampionia në fuqi në fillimin e kualifikimeve për Kampionatin Evropian. Më pak se dy vjet pasi mundi Anglinë me penallti për të triumfuar në “Euro 2020”, Italia nisi kampanjën për të arritur në “Euro 2024” me humbje 2:1 në shtëpi ndaj të njëjtës kundërshtare - Anglisë. Kjo disfatë e Italisë u përcoll me fitore 2:0 ndaj Maltës, por ka shumë gjëra për t’u përmirësuar në ekipin e trajnerit Roberto Mancini.

“Ne mund të kishim dhe duhej të kishim bërë më mirë. Në çfarë? Pothuajse gjithçka”, pranoi Mancini. “Ne i bëmë disa gjëra si duhet dhe të tjerat më pak. Ishte e rëndësishme të fitonim ndaj Maltës, por duhet të kishim shënuar më shumë gola”.

Ndeshjet e para kualifikuese për “Euro 2024” u zhvilluan pak më shumë se tre muaj pas Kupës së Botës “Katari 2022”, ngjarje në të cilën Italia nuk u kualifikua. Pasi Italia nuk arriti të kualifikohej edhe në Kupën e Botës 2018, u fut në kualifikime për “Euro 2020”. Fitoi 10 ndeshjet e saj në grup, duke shënuar 37 gola dhe duke pranuar vetëm katër. Skuadra e Mancinit më pas vazhdoi me triumf në turne dhe ringjallja e Italisë dukej se ishte e plotë. Por paraqitjet e fundit kanë ngritur dyshime nëse triumfi i Italisë ishte me të vërtetë një kthim në krye apo një anomali e nxitur nga pasioni dhe entuziazmi i një vendi që po rimëkëmbet nga të qenit një nga më të goditurit nga pandemia e koronavirusit.

Italianët dominuan sukseset sportive dy vjet më parë. Italia ka fituar vetëm tetë nga 20 ndeshjet e saj që nga ngritja e trofeut të Kampionatit Evropian. Humbja e së enjtes së shkuar ndaj Anglisë ishte e para në kualifikimet e Kampionatit Evropian që nga viti 2006 dhe ishte hera e parë që Italia humbi ndeshjen hapëse në gati 50 vjet.

Një gjë e ndritshme për Mancinin dhe Italinë kundër Anglisë ishte se sulmuesi Retegui shënoi në debutimin e tij ndërkombëtar. Sulmuesi i lindur në Argjentinë, i cili ka nënshtetësi italiane përmes gjyshes së tij nga nëna, e pasoi këtë duke shënuar golin e epërsisë edhe ndaj Maltës.

“Ai e theu ngërçin, i cili ishte vendimtar. Por ai ende ka nevojë për kohë dhe për të njohur futbollin evropian”, tha Mancini.

23-vjeçari Retegui e ka kaluar të gjithë karrierën deri më tani në Argjentinë, ku luan për ekipin Tigre si huazim nga Boca Juniorsi. Ai ishte golashënuesi më i mirë në ligën vendase sezonin e kaluar me 19 gola dhe gjithashtu kryeson renditjen aktuale këtë edicion, duke shënuar gjashtë herë në tetë ndeshje.

“Ai është golashënues, ne e pamë këtë gjatë periudhës që po e ndiqnim”, tha Mancini. “Sigurisht që ai duhet të vendoset, duhet të përshtatet në disa mënyra, por Retegui shënon gola dhe kjo është një karakteristikë e rëndësishme për një qendërsulmues. Ai ka cilësitë, por ne duhet t'i japim kohë. Ai është si një nxënës në një shkollë të re”.

Retegui tashmë ka filluar të pëlqehet nga klubet italiane, me Interin që raportohet se është në krye të listës. Interi ka bonusin për shkak se ka një tjetër lojtar të lindur në Argjentinë me pasaportë italiane në radhët e tij, Facundo Colidio. Për më tepër, ai është i huazuar te Tigre.

“Do të ishte një gjë e mirë nëse Retegui do të vinte në Serie A”, tha Mancini. "Unë mendoj se do t'i jepte më shumë forcë, do të arrinte të mësonte gjuhën dhe rrjedhimisht, të komunikonte më mirë me shokët e skuadrës”.