Futbolli i mirë dhe fitoret e mëdha ndihmojnë Barcelonën ta lërë anash skandalin

Duke luajtur futboll të mirë dhe duke fituar ndeshje të mëdha, Barcelona po lë mënjanë shpërqendrimet e skandalit të fundit. Me fitoren e saj të dytë ndaj Real Madridit në më pak se tre javë, Barcelona u sigurua që të flitej më shumë për aftësinë e skuadrës në fushë sesa për problemet e pretenduara të klubit larg saj.

Klubi katalonjas ka qenë nën vëzhgim për pagesat e tij prej disa miliona dollarësh gjatë disa viteve ndaj ish-zëvendëspresidentit të komitetit të arbitrave të vendit. Klubi do të duhet të mbrohet në gjykata pasi akuzohet zyrtarisht nga prokurorët me akuza për korrupsion, mashtrim dhe falsifikim dokumentacioni. Megjithatë, Barcelona po e mban veten mirë në fushë. Ajo u mblodh për një fitore 2:1 ndaj Madridit të dielën mbrëma për të siguruar titullin e saj të parë të ligës spanjolle që nga viti 2019. Fitorja ndaj Realit erdhi në kohën shtesë me golin e shënuar nga mesfushori Franck Kessie.

Real Madridi kaloi herët në epërsi në “Camp Nou”, por nuk arriti ta mbajë epërsinë deri në fund, duke i mundësuar Barcelonës që të ketë një avantazh më shumë se komod prej 12 pikësh ndaj rivalit të saj më të madh me 12 ndeshje të mbetura deri në fund të sezonit.

“Të gjithë ishin të lumtur në zhveshtore”, tha trajneri i Barcelonës, Xavi Hernandez. “Nuk mund të harrojmë se nga vijmë. Vitin e kaluar, diferenca me Realin ishte 12 pikë, por ne ishim prapa. Në tetor ishim tre pikë prapa, kështu që kompensuam 15 pikë ndaj Real Madridit. Ne duhet të përgëzohemi për gjërat që po i bëjmë në këtë klub”.

Real Madridi është ndër klubet që kanë dalë publikisht kundër Barcelonës në procedurat ligjore, siç është Qeveria spanjolle, liga dhe federata e futbollit. Barcelona ka mohuar vazhdimisht se ka bërë diçka ilegale ose ka pasur konflikt interesi, duke thënë se ka paguar për raportet teknike të gjyqtarëve, por kurrë nuk është përpjekur të ndikojë në vendimet e tyre në ndeshje. Real Madridi u largua nga “Camp Nou” duke u ankuar për arbitrimin, megjithatë, pasi goli i tij në minutën e 81-të nga Marco Asensio u anulua nga rishikimi i VAR-it për pozitë jashtë loje. Trajneri i Realit, Carlo Ancelotti, tha se pozicioni jashtë loje nuk ishte mjaft i qartë për t'u anuluar. Barcelona tashmë ishte shpëtuar nga VAR-i fundjavën e kaluar kur goli i barazimit të Athletic Bilbaos u anulua pas një loje të diskutueshme me dorë të Inaki Williamsit në minutën e 87-të. Pavarësisht ndihmës së fundit, Barcelona ka luajtur mirë nën trajnerin Xavi dhe ka gjetur mënyra për të fituar edhe kur nuk ishte në formën e saj më të mirë ose që po përballet me lëndime si ato të fundit, të Robert Lewandowskit, Ousmane Dembeles dhe Pedrit.

Barcelona po kërkon titullin e saj të parë në ligë që kur u tërhoq në një krizë të thellë financiare që çoi në largimin e Lionel Messit në Paris Saint-Germain. Është duke ndjekur trofeun e 27-të të ligës, që do ta linte në tetë pas Real Madridit. Barcelona fitoi tetë tituj ligë në 11 sezone deri në vitin 2019. Që atëherë, ajo përfundoi e dyta pas Real Madridit në vitin 2020, e treta - pas Real Madridit dhe kampionit Atletico Madrid - në 2021, dhe e dyta pas Real Madridit përsëri sezonin e kaluar pa Messin. Këtë vit, Barça tashmë ka fituar Superkupën e Spanjës - trofeu i parë i ekipit që nga Copa del Rey në vitin 2021. Klubi katalonjas u eliminua përsëri nga Liga e Kampionëve dhe Liga e Evropës, por ka mbetur i gjallë në Kupën e Spanjës. Përballë e ka Realin Madridin në gjysmëfinale, ndërsa ndeshjen e parë e ka fituar 1:0 në stadiumin “Santiago Bernabeu” pas një paraqitje tjetër solide. Ndeshja e kthimit është muajin e ardhshëm në “Camp Nou”. Barcelonës do t'i duhet një tjetër rezultat i madh edhe në këtë duel për të mbajtur në qendër të vëmendjes skuadrën e Xavi dhe jo problemet e klubit jashtë fushës.

“Ne kemi fituar vetëm Superkupën deri më tani”, tha Xavi. “Liga është e jona për ta humbur. Nuk mund të pushojmë. Shpresojmë që lojtarët të kthehen mirë nga pushimet ndërkombëtare”.