Ka qenë një periudhë relativisht e dobët për Erling Haalandin. Kjo kishte ndodhur para se ai të barazonte rekordin e pesë golave në një ndeshje të Ligës së Kampionëve, kur Manchester City fitoi ndaj Leipzigut, 7:0, të martën mbrëma.
Haalandi kishte shënuar vetëm tri gola në nëntë paraqitjet e tij të fundit – që ishte seria më e dobët e sezonit – por tani ka shënuar 39 gola në 35 paraqitje qëkur iu bashkua Cityt vitin e kaluar.
Numri do të mund të ishte edhe më i madh nëse Pep Guardiola nuk do ta zëvendësonte atë pas pak më shumë se një orë lojë kundër Leipzigut, kur u sigurua vendi në çerekfinale.
Pasi vendosi për një gjë të tillë, trajneri i Cityt ia mohoi Haalandit të arrinte rekord në nivel klubesh në futbollin evropian dhe ta kalonte edhe të madhin Lionel Messi, si i vetmi që ka shënuar gjashtë gola brenda një ndeshjeje. Luiz Adriano po ashtu ka shënuar pesë gola.
“Nëse ai do ta arrinte këtë shifër në moshën 22-23-vjeçare, jeta e tij do të ishte e mërzitshme”, ka bërë shaka Guardiola më pas. “Ai nuk do të kishte objektiv për ta arritur në të ardhmen”.
Me këtë ritëm të shënimit të golave, do të jetë vetëm çështje kohe kur të arrihet rekordi i ardhshëm nga norvegjezi.
Më i shpejti me 30 gola
Të martën, Haaland u bë lojtari që më së shpejti arriti shifrën e 30 golave në Ligën e Kampionëve, duke e thyer rekordin e regjistruar nga ish-sulmuesi i Manchester Unitedit, Ruud van Nistelrooy.
Van Nistelrooy e arriti këtë shifër në ndeshjen e tij të 34-t. Haalandit iu nevojitën vetëm 25 ndeshje.
Robert Lewandowski shënoi 30 gola në Champions në 46 ndeshje, Messi në 48 ndeshje, ndërsa Neymari në 49 ndeshje të luajtura.
Më i riu me 30 gola
Me 22 vjet e 236 ditë, Haalandi është futbollisti më i ri që shënon 30 gola në Ligën e Kampionëve.
Ai e kaloi rekordin e mbajtur nga Kylian Mbappe (22 vjet e 352 ditë), i cili kishte thyer rekordin e Messit (23 vjet e 131 ditë).
Rivalët e Premier Leagues
Haalandi tani ka vetëm gjashtë gola më pak se rekordi i vendosur për më së shumti gola të realizuar brenda një edicioni nga një lojtar i Premier Leagues.
Van Nistelrooy dhe Mohamed Salah e ndajnë këtë rekord, që është 44 gola të realizuar brenda një kampanje.
Haalandi ka 39 gola, ndërsa me Cityn ka të paktën edhe 14 ndeshje për t’i luajtur deri në fund të edicionit. Do të kishte më shumë ndeshje për të brenda edicionit, nëse kampioni i Premier Leagues avancon në Kupën FA dhe Ligën e Kampionëve.
Rekordi i Premier Leagues
Me 28 gola në ligë, Haalandi i ka kaluar golashënuesit më të mirë të sezonit të kaluar që fituan “Këpucën e Artë”, Salah dhe Heung-Min Son.
Norvegjezi ka vetëm gjashtë gola më pak të shënuar në ligë sesa rekordi i 34 golave të realizuar, i vendosur nga Andy Cole në vitin 1994 dhe Alan Shearer në vitin 1995.
Duket se ky rekord do të thyhet shumë shpejtë – ndoshta shumë më herët sesa të mbyllet kampionati.
Kampanja më e mirë e Cristiano Ronaldos në Premier League ka qenë me 31 gola, ndërsa golashënuesi më i mirë në histori të Cityt, Sergio Aguero, asnjëherë nuk ka realizuar më shumë se 26 gola.
Rekordi në rangun e parë të Anglisë mbahet nga sulmuesi i Evertonit, Dixie Dean, i cili kishte shënuar 60 gola në vitin 1928.
Messi dhe Ronaldo
Pavarësisht se sa impresive janë shifrat e Haalandit, ai mund të mos i arrijë rekordet e vendosura nga Messi dhe Ronaldo kur ishin në formën më të mirë.
Messi kishte realizuar 73 gola në të gjitha garat për Barcelonën në edicionin 2011/12, ku përfshihen 50 në ligën spanjolle.
Ronaldo realizoi 61 gola për Real Madridin në sezonin 2014/15.
A është e mjaftueshme?
Përderisa golat e Haalandit kanë vendosur standard tjetër, ka dyshime nëse ai është i duhuri për Cityn.
Pavarësisht arritjeve me gola të shënuar, kampioni në fuqi i Anglisë është në rrezik që të mos e mbrojë titullin, pasi Arsenali është i pari në tabelë me pesë pikë më shumë.
Kritikat kanë të bëjnë me atë se Haalandi e bën Cityn shumë të parashikueshëm.
Liga e Kampionëve është synimi kryesor i klubit dhe trofeu i vetëm madhor që nuk e ka fituar qëkur familja në pushtet e Abu Dhabit e kishte marrë klubin në vitin 2008.
Haalandi e ka përshkruar shënimin e golave si “superfuqi” pas ndeshjes me Leipzigun, por Guardiola ka paralajmëruar se fuqia e sulmuesit në shënimin e golave mund të mos jetë e mjaftueshme për Cityn që ta fitojë Kupën Evropiane.
“Shumicën e kohës jemi eliminuar”, ka thënë Guardiola, “sepse kemi pranuar shumë gola”.
© KOHA. Të gjitha të drejtat janë të rezervuara.
