Manchester Unitedi do të përballet me Real Betisin në 1/8 finales të Ligës së Evropës. Shorti i tërhequr të premten ia ka dhënë kampionit të vitit 2017 një tjetër kundërshtar spanjoll, pas eliminimit të Barcelonës.
Unitedi do të presë Betisin, që renditet i pesti në La Liga, më 9 mars në ndeshjen e parë në “Old Trafford”, stadium ku Barcelona u mund 2:1 të enjten për t’u eliminuar me rezultatin e përgjithshëm 4:3 në fazën e plejofit.
“Është një skuadër që luan, një skuadër e aftë,” tha trajneri Unitedit, Erik ten Hag për Betisin. “Ne e dimë se çfarë na pret nga një kundërshtar spanjoll. Ne luajtëm gjithashtu me Real Sociedadin këtë sezon dhe e kemi parasysh se nëse luajmë mirë e kemi një shans për të mbijetuar”.
Në krye të Betisit është një trajner që e njeh Manchester Unitedin, Manuel Pellegrini. Pellegrini për tre vjet ishte trajner i Manchester Cityt, ekip me të cilin e fitoi titullin e kampionit në Premier League. Ai thotë se Unitedi ka ndryshuar shumë, sidomos këtë edicion nën urdhrat e holandezit Ten Hag.
“Nuk është aspak short i lehtë, por ne duhet të përgatitemi dhe të japim më të mirën. Unitedi e eliminoi Barcelonën, që do të thotë se është një skuadër shumë e fortë. Por, ndeshjen e kthimit e luajmë në shtëpi dhe kemi gjasat tona”, tha Pellegrini.
Skuadra e fundit ukrainase e mbetur në garat evropiane të këtij edicioni, Shakhtar Donetsku, do të përballet me liderin e ligës holandeze, Feyenoordin. Shakhtari do të ketë tre mbrojtës të suspenduar për ndeshjen e parë që do ta luajë në Poloninë fqinje, për shkak të pushtimit ushtarak rus të Ukrainës.
Lideri i Premier Leagues, Arsenali, do të përballet me Sportingun e Lisbonës, me ndeshjen e parë që do të luhet në Portugali. Arsenali ishte bartës në short, sepse ishte në mesin e tetë fituesve të grupeve të Ligës së Evropës. Ato skuadra luajnë ndeshjen e kthimit në shtëpi. Ekipet që nuk ishin bartëse e luajtën në shtëpi ndeshjen e parë të plejofit, ku përfshiheshin nënkampionët e grupeve të Ligës së Evropës dhe skuadrat që u renditën të tretat në grupet e Ligës së Kampionëve.
“Krahas kampionatit, sigurisht se suksesin do ta kërkojmë edhe në Ligën e Evropës. Kemi ekip për ta bërë një gjë të tillë dhe nuk do të dorëzohemi deri në fund. Sportingu është ekip për të cilin kam respekt të madh dhe sigurisht se na pret një punë e vështirë për të avancuar në çerekfinale”, tha trajneri i Arsenalit, Mikel Arteta.
Juventusi në 1/8 e finales do të luajë me Freiburgun, ndërsa Sevilla do të përballet me skuadrën e Fenerbahçes.
Union Berlini do të ketë një ribashkim me Union Saint-Gilloise, pasi këto ekipe u takuan dy herë në fazën e grupeve. Roma, e drejtuar nga Jose Mourinho, do të luajë me Real Sociedadin, ndërsa Bayer Leverkuseni do të ketë punë me Ferencvarosin. Ferencvarosi do ta luajë ndeshjen e dytë në “Puskas Arena” në Budapest, stadiumi ku do të zhvillohet finalja e kësaj gare më 31 maj.
Të premten është tërhequr shorti edhe për 1/8 e finales të Ligës së Konferencës. Çiftet e garës së nivelit të tretë të UEFA-së janë: Villarreal – Anderlecht, Fiorentina – Sivasspor, AEK Larnaca – West Ham, Sheriff – Nice, Lazio - AZ Alkmaar, Lech Poznan – Djurgarden, Basel – Slovan dhe Gent – Istanbul Basaksehir.
Finalja e Ligës së Konferencës është planifikuar të zhvillohet më 7 qershor në Pragë.
© KOHA. Të gjitha të drejtat janë të rezervuara.
