Barcelona do të jetë pa disa prej titullarëve të rëndësishëm për ndeshjen e kthimit kundër Manchester Unitedit, në kuadër të plejofit të Ligës së Evropës. Kjo ndeshje luhet të enjten në stadiumin “Old Trafford” dhe starton në orën 21:00.
Mesfushori Pedri dhe sulmuesi i krahut, Ousmane Dembele, nuk kanë udhëtuar fare me ekipin për shkak të lëndimeve. Ndërsa, trajneri Xavi Hernandez nuk do të mund të llogarisë as në mesfushorin tjetër, Gavi, për shkak të suspendimit.
Dueli i parë i këtyre skuadrave, që u luajt javën e shkuar në “Camp Nou”, përfundoi pa fitues, 2:2.
Mungesa e Pedrit dhe Dembeles do ta detyrojë Xavin të bëjë ndryshime në sulm, ku pritet ta inkuadrojë Ferran Torresin dhe Ansu Fatin për të luajtur përkrah polakut Robert Lewandowski. Ndërsa, Raphinha dhe Sergi Roberto do të luajnë në mesfushë, ku për partner do ta kenë holandezin Frenkie de Jong.
Xavi në konferencën për shtyp ka pranuar se ekipin e tij e pret një sfidë e vështirë. Ai ka thënë se është i shqetësuar për lodhjen e lojtarëve shkaku i orarit të ngarkuar.
“Ne jemi përgatitur për ndeshjen e kthimit, por duhet pranuar se lojtarët janë të lodhur sepse kanë luajtur shumë ndeshje. Kemi mungesa të rëndësishme, por jemi gati për këtë ndeshje të fortë kundër Manchester Unitedit, i cili në ndeshjen e parë tregoi se është një ekip shumë i fortë”, është shprehur Xavi. “Sigurisht që duam ta kalojmë këtë pengesë dhe të avancojmë tutje, pasi synimi është ta fitojmë Ligën e Evropës, por nuk do të jetë aspak lehtë. Na pret një mision i vështirë ndaj Manchester Unitedit, por jam optimist pasi lojtarët janë të motivuar për ta dhënë më të mirën përkundër lodhjes”.
Homologu i Xavit, holandezi Erik ten Hag, nuk bazohet shumë në mungesat që do t’i ketë Barcelona. Ai insiston se i ka disa ide për ta ndihmuar ekipin që ta tejkalojë Barcelonën dhe të avancojë në 1/8 e finales të Ligës së Evropës. Ten Hag ka insistuar se është i vendosur për ta mbajtur Manchester Unitedin në garë për katër trofe, me finalen e Kupës së Ligës që e luan të dielën ndaj Newcastlet.
“Ajo që do të bëjmë ndryshe nga ndeshja e parë do të shihet në fushë. I kam disa ide të cilat mendoj se do të na ndihmojnë ta kalojmë këtë pengesë të vështirë. Kjo është një ndeshje e madhe dhe të gjithë duam të luajmë ndeshje të tilla. Me padurim po e presim ndeshjen e kthimit, të cilën pres ta shijojmë dhe ta japim maksimumin për të shkuar tutje”, është shprehur Ten Hag. “Synimi ynë është të fitojmë sa më shumë trofe këtë edicion dhe do ta mbajmë këtë mentalitet. Kam kërkuar nga ekipi që në këtë ndeshje ta tregojë versionin e tij më të mirë, pasi kjo është shumë e rëndësishme”.
Manchester Unitedi nuk ka fituar trofe që nga viti 2017 kur pati triumfuar në Ligën e Evropës, ndërsa Ten Hagu, i cili mori drejtimin e ekipit para fillimit të këtij sezoni, ka kthyer shpresën për sukses. Në Premier League, Unitedi është vetëm pesë pikë prapa liderit, Arsenalit.
Ten Hag ka zbuluar se për ndeshjen e kthimit ndaj Barcelonës në ekip janë kthyer braziliani Antony e mbrojtësi Harry Maguire, të cilët janë rikuperuar nga lëndimet dhe janë të gatshëm për të luajtur. Ndërkohë, Anthony Martial mbetet ende jashtë fushe për shkak se nuk është rikuperuar plotësisht. Për ta eliminuar Barcelonën, te Manchester Unitedi shpresat më të mëdha i kanë te sulmuesi Marcus Rashford, i cili po shkëlqen këtë sezon. Aktualisht, Rashford është në kuotën e 24 golave të shënuar këtë edicion, prej të cilëve 16 i ka shënuar prejse ka përfunduar Botërori “Katari 2022”.
“Natyrisht që mbështetemi te Marcusi, i cili po tregohet lojtari ynë kryesor këtë vit. Ai po luan shumë mirë dhe shpresoj që të tregohet i rëndësishëm edhe kundër Barcelonës. Nëse ai është në formë dhe ekipi bën paraqitje si në ndeshjen e fundit, atëherë besoj fuqishëm se së bashku mund ta mposhtim Barcelonën”, ka pranuar Ten Hag.
© KOHA. Të gjitha të drejtat janë të rezervuara.
