Loshaj synon të lërë gjurmë në futbollin turk

Istanbulspori shënoi fitore shumë të rëndësishme në garën për mbijetesë. Tani i ka 21 pikë nga 22 ndeshje. Mbetet në pjesën e tabelës që dërgon në kategorinë e dytë.

Në minutën e 77-të, Loshaj fitoi top në gjysmën e tij të fushës dhe me pasim të gjatë e gjeti Emir Gultekinin që realizoi. Ai nisi aksionin edhe për golin e parë.

Loshaj u zyrtarizua të shtunën tek Istanbulspori, ndërsa të dielën luajti prej minutës së 43-të.

26-vjeçari është i kënaqur me debutimin, ndërsa pret të ketë edhe më shumë hapësirë.

“Shpresoj që do të mbijetojmë në Superligë dhe të garojmë edhe sezonin e ardhshëm në elitë. Individualisht shpresoj të kem sa më shumë minuta në fushë dhe shpresoj në paraqitje të mira”, ka thënë Loshaj për KOHËN.

Loshaj së fundi ishte pjesë e Cracovias në Poloni, ku nuk kishte hapësirë. Ai e ka vlerësuar hap para kalimin në Turqi.

“Superliga e Turqisë për mua është hap para. Ky transferim ka qenë i planifikuar në verën e kaluar, por ekipi ku kam qenë nuk ka bashkëpunuar. Superliga turke është një ligë shumë cilësore, me disa ekipe gjigante evropiane dhe me lojtarë të mëdhenj”.

Në skuadrën turke, Loshaj i është bashkuar Valon Ethemit, Eduard Rrocës, Jetmir Topallit dhe Sidrit Gurit.

Ethemi me asistim të Rrocës shënoi golin e parë të dielën.

Loshaj pret të kaloj mirë me shqiptarët në skuadër. Ai nuk e di sa do të mbetet pjesë e futbollit turk, por synon të lërë gjurmë.

“Momentalisht e kam fokusin maksimal tek Istanbulspori. Prioriteti im është ta ndihmoj ekipin për të mbijetuar”, ka thënë Loshaj, që ka nënshkruar kontratë të vlefshme deri në verën e vitit 2027.

Loshaj ftohet rregullisht nga Kosova. Ai pritet të marrë ftesë edhe për ndeshjet e para kualifikuese për “Euro 2024”.

“Kemi ekip shumë cilësor dhe gjithë lojtarët po kalojnë formë të mirë në klubet e veta. Do të bëjmë gjithçka për të shkruar histori”, ka thënë Loshaj.

Ai për Kosovën i ka luajtur 17 ndeshje.

© KOHA. Të gjitha të drejtat janë të rezervuara.