Sport

Të kategorizuar si trajnerë edhe drejtues federatash e sportistë aktivë

Vitin e kaluar, Sabri Dragusha ishte i renditur në vendin e 12-të në listën e trajnerëve që përfituan financiarisht nga Rregullorja për Kategorizimin e Sportistëve dhe Trajnerëve. Vlerësimi ishte bërë nga Komisioni për Kategorizimin e Sporteve, Sportistëve dhe Trajnerëve i caktuar nga Komiteti Olimpik i Kosovës. Trajneri Dragusha, që mban edhe postin e sekretarit të përgjithshëm të Federatës së Bodibildingut dhe Fitnesit të Kosovës, kishte dhjetë pikë në kategorizim. Në listën e trajnerëve përfitues vjet ishte edhe Esat Lata, po ashtu nga sporti i bodibildingut. Lata është kryetar i Federatës së Bodibildingut dhe Fitnesit të Kosovës. Por, Lata ishte dukshëm më lart i ranguar se Dragusha. Ishte i pesti me 17.5 pikë.

Image

Si Dragusha, ashtu edhe Lata u kategorizuan falë sukseseve të garuesve Kushtrim Bajraktari dhe Granit Kuleta. Të dy garuesit i kanë arritur sukseset në vitin 2021. Bajraktari zuri vendin e dytë në Botëror, ndërsa Kuleta doli i gjashti.

Dragusha e Lata janë kategorizuar edhe sivjet. Por, me ndryshim pozitash e pikësh. Dragusha këtë vit është në vendin e gjashtë me 17.5 pikë, sa i kishte Lata vitin e kaluar. Lata sivjet është i 12-i me 10 pikë. Federata të cilën e drejtojnë Lata dhe Dragusha është në Kategorinë C të sporteve.

Image

“Nuk jemi sport olimpik dhe prandaj jemi të renditur më poshtë se trajnerët e sporteve të tjera. Kjo është rregullore që duhet respektuar. Kemi qenë edhe më herët. Para se të merrnim postet drejtuese të Federatës, unë dhe Esati kemi qenë trajnerë dhe nuk prish punë. Kujdesi për garuesit tanë është maksimal. Ndoshta as familjarët e tyre nuk kujdesen më shumë se ne. Një gabim mund t’i kushtojë sportistit”, ka thënë Sabri Dragusha të mërkurën për KOHËN.

Ndonëse me poste drejtuese në federatë, përfitimin nga kategorizimi ua lejon Rregullorja. Të paktën kështu thonë përgjegjësit.

Image

Kategorizimi ka vlerë të madhe, pasi në bazë të tij ndahet buxheti i shtetit për federatat sportive e po ashtu përcaktohet përkrahja për trajnerët dhe sportistët. Sa më lart në renditje, të hyrat janë më të mëdha.

Kategorizimi bëhet në bazë të dokumentacionit që dorëzojnë federatat sportive. Dhe favorizimet nuk përjashtohen.

“Kohëzgjatja e përfitimit të të drejtave nga kjo kategori është tre vjet për sportet individuale dhe katër vjet për sportet kolektive”, shkruan në pikën 3 të nenit 10 të Rregullores për Kategorizimin e Sportistëve dhe Trajnerëve.

Image

Një pozitë më poshtë se Lata, është Agron Tosuni. Trajneri Tosuni u kategorizua nga sportit universitar dhe u vlerësua nga Komisioni me 6.25 pikë. Sporti Universitar vlerësohet të jetë rekreativ, aktivitet për studentë, dhe sportistët e tij nuk përfitojnë nga Rregullorja për Shpërblime nga MKRS-ja.

Tosuni është përfshirë në listën e 23 trajnerëve të kategorizuar falë suksesit ë karateistit, Betim Maliqi, që po ashtu është në listën e sportistëve të kategorizuar. Tosuni ka qenë edhe vjet i përfshirë me 5 pikë, kurse sivjet i ka 6.25 pikë.

Listës bindshëm i prin trajneri më i suksesshëm në vend, Driton Kuka. Kuka me nxënësit e tij ka fituar shumë medalje evropiane e botërore në xhudo. Mbi të gjitha, në Lojërat Olimpike në Tokio udhëhoqi Distria Krasniqin dhe Nora Gjakovën drejt medaljeve të arta.

Image

Por, me më së shumti trajnerë të përfshirë është sporti i karatesë. Plot 11 trajnerë të karatesë do të përfitojnë financiarisht nga shteti.

Në listë janë Azdren Myrtaj, Isak Curri, Shqipe Zogiani, Shkelzen Balaj, Ylber Syla, Naim Shatri, Orges Arifi, Muhamet Rexhepi, Fortesa Orana, Elhami Shabani dhe Bajram Bajrami.

Image

Zogiani aktualisht nuk është duke stërvitur ndonjë garues, ndërsa Orana e Shabani do të përfitojnë financiarisht edhe si sportistë. Orges Arifi ka përfituar si trajner, por është ende aktiv si sportist. Pra, shumë garues kanë edhe funksionin e trajnerit.