Çereku i katërt ishte vendimtar për fitoren e 13-të radhazi të kampionit të Kosovës në basketboll, Golden Eagle Ylli, të shtunën ndaj Ponte Prizrenit. Therandasit triumfuan 73:64.
Në letër, Ponte Prizreni ishte vendës, por për shkak të punimeve në “Sezai Surroi”, ndeshja u luajt në “13 Qershori”. Të dy skuadrat u përballen mes vete edhe para tre ditësh në palestrën e njëjtë, në ndeshjen e mbetur, ku kishte triumfuar Ylli.
Ndeshja ishte pothuajse e barabartë gjatë tërë kohës, por një seri prej 12:0 në çerekun e katërt e Yllit definoi fituesin. Çerekun e katërt, skuadra e drejtuar nga Adis Beçiragiq e mbylli me epërsi prej tetë pikëve (23:15).
Henrik Shirko (15 pikë), Malcolm Armstead (15), Chris Harris (13) dhe Rashun Davis (11) shënuan pikë dyshifrore tek Ylli.
Te Ponte, Burke pati 15 pikë, Grant 12, Urim Zenelaj 12 e Muhamedali Janjeva 11.
Yllin ka 13 fitore krahas katër humbjeve që i pësoi në katër ndeshjet e para. Me fitore në ndeshjen e mbetur ndaj Rahovecit të mërkurën, Ylli mund të bëhet lider i ri i Superligës.
Ponte ka gjashtë fitore dhe 12 humbje.
© KOHA. Të gjitha të drejtat janë të rezervuara.
