Jude Bellingham ende nuk është pajtuar me dështimin e Përfaqësueses së Anglisë në Kupën e Botës “Katari 2022”. Mesfushori i Borussia Dortmundit tha të enjten se ende mendon se çfarë mund të kishte bërë më mirë për të parandaluar eliminimin e Anglisë në fazën e hershme të turneut në Katar.
Anglia u eliminua në çerekfinale nga Franca. U mposht me rezultatin 2:1. Sulmuesi Harry Kane pati mundësinë për të barazuar shifrat në fund të ndeshjes, por dështoi nga penalltia.
Duke folur për uebsajtin e Dortmundit nga kampi stërvitor në Spanjë, Bellingham, pasimet e të cilit siguruan dy penalltitë e Anglisë në duelin ndaj Francës, tha se ende pyet veten se çfarë ka mundur të bënte më shumë për ta mbajtur përfaqësuesen në turne.
“Unë ende mendoj për atë ndeshje. Ka pasur një rast në stërvitje me Dortmundin ku kam pasur një gjuajtje dhe mendova se ishte njësoj si ajo që pata në ndeshjen e Francës”, ka treguar 19-vjeçari. “Dhe nëse do të gjuaja pak më majtas, a do të kishim fituar? Isha i përfshirë në penalltinë e parë ku pasova për Sakan, si dhe në të dytën kur pasova te Mounti. Dhe unë gjithmonë mendoj, po sikur të kisha pasur më mirë dhe Mounti të shënonte, atëherë nuk do të kishte fare penallti të dytë. Po i mendoj shumë gjëra, ndonëse më duhet të pajtohem për shkak se nuk mund të ndryshoj asgjë”.
Bellingham pranoi se nuk mund të jetë i zhgënjyer me paraqitjen personale dhe të Anglisë në Katar. Anglia është në kërkim të trofeut të parë të madh që nga viti 1966.
“Edhe pse u eliminuam më herët sesa kishim parashikuar, mund të them se ne patëm një turne për të cilin vendi mund të krenohet. Ne bëmë një luftë vërtet të fortë kundër një prej ekipeve më të mira në botë. Në u eliminuam me rezultat të ngushtë dhe na mungoi fati në fund”, shtoi Bellingham.
“Sikur ta kishim mundur Francën dhe të kishim kaluar, kush e di se çfarë mund të ndodhte. Por tani gjithçka është ‘nëse’”.
Bellingham, i cili në një moment ishte i vetmi lojtar i Dortmundit që kishte luajtur çdo minutë për skuadrën këtë sezon, tha se ishte i lodhur pas Kupës së Botës, porse është i uritur që të luajë sërish. Bundesliga vazhdon javën tjetër, ndërsa Dortmundi ndeshjen e parë e luan më 22 janar në shtëpi ndaj Augsburgut.
"Pas Kupës së Botës thjesht u rraskapita fizikisht. Dhe thashë me vete, dua të bëj një pushim të gjatë të bukur. Por rreth dy javë pas kësaj mendova se më duhet të kthehem dhe të bëhem gati për sezonin”, shtoi Bellingham. “Me padurim pres ndeshjen e parë. Të gjitha ligat e tjera kanë filluar dhe dua që së bashku me klubin t’i arrijmë synimet që i kemi”.
Bellinghami këtë sezon ka nëntë gola e tri asistime në të gjitha garat për Dortmundin, që renditet i gjashti në Bundesligë me 25 pikë të mbledhura, nëntë më pak se Bayerni që është lider. Për Bellinghamin ky pritet të jetë sezoni i fundit në Gjermani, pasi në verë pritet ta vazhdojë karrierën në një ekip më të madh dhe ligë më të fortë.
Ai ka kohë që po kërkohet nga Real Madridi, Liverpooli e Manchester City, skuadra që janë të gatshme të paguajnë mbi 100 milionë euro për transferimin e anglezit të jashtëzakonshëm.
© KOHA. Të gjitha të drejtat janë të rezervuara.
