Nora Gjakova ka mbetur pa medalje në Mastersin e xhudos që po mbahet në Jerusalem. Në luftë për medalje të bronztë, Nora pësoi nga Mimi Huh e Koresë së Jugut. Lufta ishte e forta dhe taktike, ndërsa fare në fund Huh erdhi te fitorja.
Nora ka garuar në kategorinë deri 57 kilogramë, ndërsa renditet e pesta. Ka fituar 648 pikë në ranglistën botërore.
Nora ishte e lirë në xhiron e parë. Në të dytën e kaloi polaken Julia Kowalczyk. Në çerekfinale u mposht nga francezja Sara Leonie Cysique. Por garimin e vazhdoi përmes repesazhit.
E mposhti britaniken Lele Nairne për të siguruar përballjen me koreanen Mimi Huh.
Nora ishte bartësja e pestë në Masters, ndërsa Huh e shtata.
Xhudistja pejane është ende në kërkim të formës më të mirë, pas mungesës së gjatë nga garat. Nora nuk kishte garuar nga Lojërat e Tokios e deri më 21 tetor të këtij viti. Të artën olimpike e kishte fituar më 26 korrik të vitit të kaluar. Ka operuar krahun dhe ka pasur fazë të gjatë rikuperimi.
Ajo u kthye në Grand Slamin e Abu Dabit, ku fitoi medaljen e argjendtë. Në Grand Slamin në Baku, më 4 nëntor, fitoi medaljen e bronztë. Dhe gara e së martës ishte e fundit për të në këtë vit.
© KOHA. Të gjitha të drejtat janë të rezervuara.
