Sport

Xhudistet kërkojnë medalje në garën përmbyllëse të vitit

Xhudo - Loriana Kuka

Dy kampionet olimpike, Nora Gjakova e Distria Krasniqi, si dhe Loriana Kuka e Laura Fazliu, e përfaqësojnë Kosovën në Mastersin e xhudos që prej të martës e deri të enjten mbahet në Jerusalem të Izraelit.

Pos që është gara e fundit e vitit, Mastersi është prej ngjarjeve më të mëdha. Në të marrin pjesë vetëm xhudistët më të mirë në kategori, ndërsa pikët e shumta që i ofron ia rritin vlerën. Medalja e artë në Masters siguron plot 1800 pikë në ranglistën botërore. Vetëm Botërori ofron më shumë pikë – 2000. E arta në Grand Slam “shpërblehet” me 1000 pikë, ndërsa për të artën në garat Grand Prix dhe në kampionatet kontinentale fitohen 700 pikë. Nëse për bazë merren pikët, atëherë Mastersi ka vlerë gati dy herë më të madhe se Grand Slami dhe dy herë e gjysmë më të madhe se garat Grand Prix dhe Evropiani.

Për shkak të numrit të madh të pikëve në rrugëtimin drejt Lojërave të Parisit, trajneri Driton Kuka ka vendosur që të dërgojë të gjitha xhudistet e kualifikuara në Masters. Po ashtu ka vendosur që të udhëtojë edhe vetë me ekipin. Për shkak të lëndimit mungon Akil Gjakova.

“Është gara e fundit e vitit dhe natyrisht garë me shumë peshë. Numri i pikëve është shumë i madh dhe kjo i jep vlerë shtesë Mastersit. Paraqiten vetëm më të mirët nëpër kategori, pra jo të gjithë mund të marrin pjesë. Xhudistet janë në formë të mirë dhe natyrisht synojmë medalje. Të gjitha mund të përfshihen në luftë për medalje”, ka thënë Driton Kuka të martën për KOHËN.

367 xhudistë nga 58 shtete të ndryshme paraqiten në Mastersin e Jerusalemit. Gjatë një viti mbahet vetëm një garë e nivelit Masters, derisa gara Grand Slam e Grand Prix ka më shumë.

Të martën garojnë Distria Krasniqi në kategorinë deri 52 kilogramë dhe Nora Gjakova në kategorinë deri 57 kilogramë.

Distria është bartësja e gjashtë, ndërsa Nora është bartësja e pestë. Të mërkurën garon Laura Fazliu, që nuk është bartëse në kategorinë deri 63 kilogramë. Ndërkohë të enjten garon Loriana Kuka, që po ashtu nuk është në mesin e bartëseve në kategorinë deri 78 kilogramë.

Distria ka pasur suksese gjatë tërë vitit dhe synon tjetër medalje në Masters. Në formë të mirë është edhe Laura Fazliu, nënkampionia evropiane. Ndërkohë Nora e Loriana janë në kërkim të formës më të mirë pasi kanë kaluar telashet me lëndime.