Sport

Deschamps synon ta thyejë mbrojtjen marokene

Trajneri i Francës, Didier Deschamps e ka quajtur mbrojtjen e Marokut si repartin më të mirë në këtë Kampionat Botëror.

Këtë vlerësim, Deschamps e ka bërë të martën, një ditë para ndeshjes gjysmëfinale mes Francës dhe Marokut. Maroku ka pranuar vetëm një gol deri më tani në turneun e Katarit dhe ai ishte autogol i shënuar në fitoren 2:1 ndaj Kanadasë në fazën e grupeve.

Përkundër kësaj, trajneri francez ka insistuar se ekipi i tij do ta gjejë mënyrën për ta thyer mbrojtjen e Marokut dhe do të shënojë gola.

“Duhet pranuar se mbrojtja e Marokut është më e mira në këtë turne, por jam i bindur se do ta gjejmë mënyrën për ta thyer dhe për të krijuar raste për shënimin e golave. Futbollistët e kanë parasysh këtë dhe sigurisht se do të bëjnë të pamundurën për ta fituar ndeshjen”, është shprehur Deschamps.

Franca është kampione në fuqi, ndërsa Maroku po luan për herë të parë në gjysmëfinale të një Botërori.