Kryeministri i Shqipërisë, Edi Rama, ka folur sot në një bashkëbisedim me gazetarët edhe për situatën rreth Granit Xhakës e Xherdan Shaqirit në lidhje me ndeshjen Zvicër – Serbi në Botërorin e futbollit “Katar 2022”.
Zvicra triumfoi 3:2, ndërsa Shaqiri shënoi një nga golat.
Rama tha se nuk kishte pse të reagonte vetë pasi është kryeministër i Shqipërisë e jo Zvicrës. Ai ka folur për reagimet e tjerëve.
“Nacionalizmi është sa qesharak po aq i rrezikshëm. Nuk është e nevojshme, nuk e shoh të nevojshme. Më duket është për të ardhur keq. Si mund të shkëputen nga skuadra e tyre, dy lojtarë që janë qytetarë të denjë e të nderuar të atij shteti, dhe për këtë arsye luajnë me përfaqësuese, për shkak të kombësisë së tyre, e të përdoren mish për top, për një lojë luftash ballkanike”, tha Rama, në një bashkëbisedim me gazetarët.
Por në vitin 2018 në fitoren 2:1 të Zvicrës ndaj Serbisë, Rama, kishte postuar në Facebook fotot e Xhakës e Shaqirit duke festuar me shqiponjë. Ai kishte shkruar “Foto e ditës”.
Ai madje kishte publikuar edhe në Facebookun e tij nismën “Mos kini frikë nga shqiponja!”, nismë që ishte bërë për të mbledhur fonde për të paguar gjobat e Shaqirit e Xhakës.
© KOHA. Të gjitha të drejtat janë të rezervuara.
