Trepça assesi të kthehet te rezultatet pozitive në Superligën e Kosovës në basketboll. Pas humbjes nga Prishtina, Trepça ka pësuar humbje edhe nga Ponte Prizreni në qytetin e vjetër. 85:75 në të mirë të Pontes përfundoi ndeshja.
Pati një ndërprerje në çerekun e dytë dhe më pas ndeshja vazhdoi pa shikues të pranishëm. Por më shumë shfaqi skuadra vendase që mori dy pikë të rëndësishme. Ndeshja ishte e mbetur e xhiros së tetë. Dachon Burke ishte i jashtëzakonshëm te Ponte Prizreni.
Ai ndeshjen e mbylli me 38 pikë, tetë kërcime e tetë asistime. Urim Zenelaj i kishte 14 pikë e nëntë kërcime, ndërsa Meriton Ismaili e Muhamedali Janjeva i shtuan nga 12 pikë. Drilon Hajrizi ishte më i miri te Trepça me 20 pikë e 12 kërcime.
Trepça tani ka gjashtë fitore e pesë humbje, ndërsa Ponte ka pesë fitore e pesë humbje.
20:03
Vazhdon ndeshja në Prizren
Pas zbrazjes së palestrës në Prizren, ka vazhduar ndeshja mes Ponte Prizrenit dhe Trepçës.
Ndërprërja ka zgjatur rreth 20 minuta.
19:35
Ndërpritet ndeshja Ponte Prizreni – Trepça
Është ndërprerë ndeshja e basketbollit mes Ponte Prizrenit dhe Trepçës. Ndeshja është e mbetur dhe i takon xhiros së tetë të Superligës.
Ndeshja është ndërprerë në fund të periudhës së dytë pasi kishte hedhje të gjësendeve. Ponte Prizreni po udhëheq 32:27.
