Në Federatën e Basketbollit të Kosovës e vlerësojnë të papranueshme qasjen aktuale të klubeve të basketbollit (djemtë) nga Shqipëria ndaj Ligës Unike. FBK-ja po angazhohet maksimalisht që Liga Unike të vazhdojë, por angazhimi i saj për momentin nuk po del të jetë i mjaftueshëm.
Të martën janë shtyrë dy ndeshje të xhiros së parë të Ligës Unike, që është dashur të luhej të mërkurën e të enjten. Bëhet fjalë për ndeshjet Golden Eagle Ylli – Tirana dhe Trepça – Teuta. Ndeshjet janë shtyrë me arsyetimin se klubet nga Shqipëria nuk janë ende gati.
Shorti për Ligën Unike te basketbollistët është tërhequr të premten, pasi të enjten u luajt takimi Peja – Ponte Prizreni. Nuk është e zakonshme që ndeshjet të luhen pa u tërhequr shorti në një ligë. Ndërkohë në short në vend të Vllaznisë së Shkodrës u përfshi Apolonia. Dhe të martën u kuptua që Tirana e Teuta nuk vijnë në Suharekë, përkatësisht në Mitrovicë për ndeshjet e xhiros së parë.
Liga Unike është formuara nga federatat përkatëse të Kosovës e Shqipërisë, por aktualisht FBK-ja po bën përpjekjet maksimale për ta mbajtur gjallë atë.
Basketbolli në Kosovë është në nivel dukshëm më të lartë se në Shqipëri. Klubet investojnë disa herë më tepër dhe janë dukshëm më të organizuara. Shikueshmëria është, po ashtu, shumë herë më e lartë.
Klubet nga Shqipëria pos që janë inferiore sa i takon konkurrencës, aktualisht po kanë telashe edhe për të marrë pjesë.
“I kemi shtyrë dy ndeshjet në Kosovë, ndërsa dy ndeshjet në Shqipëri luhen. Të premten nga ora 11:00 në Tiranë, përkatësisht në Federatën Shqiptare të Basketbollit, e kemi thirrur një takim me të gjitha klubet nga Shqipëria që luajnë në Ligën Unike. Takimi është thirrur për t’iu treguar se kështu nuk shkon më. Duhet të zotohen që do të marrin pjesë. Ne si FBK dhe klubet nga Kosova po bëjmë përpjekje maksimale që ta mbajmë gjallë dhe ta zhvillojmë këtë ligë. Kështu që të premten do të dihet për të gjitha. Ne të premten e kaluar kemi pasur konfirmimin e të gjitha ekipeve nga Shqipëria. Sot na thanë që nuk janë gati”, ka thënë të martën për KOHËN sekretarja e përgjithshme e FBK-së, Elvira Dushku. Ajo është edhe anëtare e Bordit të Ligës Unike.
Kamza – Peja (e mërkurë 18:00) dhe Apolonia – Ponte Prizreni (e enjte 17:00) pritet të zhvillohen. Në Ligën Unike për basketbolliste tashmë janë luajtur ndeshjet e xhiros së parë. Madje ato janë dominuar nga ekipet prej Shqipërisë. Te basketbollistet klubet në Shqipëri janë më të organizuara dhe pjesëmarrja nuk vihet në dyshim aktualisht.
Liga Unike është vlerësuar shumë lart, ndërsa është bërë bujë shumë e madhe për fillimin e saj, ndonëse dihej që basketbolli në Kosovë qëndron shumë më lart. Edhe në edicionin e kaluar, që ishte i dyti, ka pasur telashe. Por jo sa janë aktualisht.
“Për ne kjo është e papranueshme. Ne bëjmë shumë për Ligën Unike. Angazhohemi për të siguruar mjete nga Ministria, nga sponsorët. E kemi edhe sponsorin gjeneral, së shpejti. Kështu që të premten në takim gjërat duhet të ndryshojnë nga ana e ekipeve nga Shqipëria. Duhet të ndryshohet qasja dhe të bëhen shumë serioze në aspektin e Ligës Unike. Kjo ligë është themeluar nga të dy federatat. Më duhet të theksoj që ekipet e basketbollisteve janë mirë të organizuara dhe deri më tani çdo gjë ka shkuar në rregull”, ka shtuar Dushku.
Prej gushtit ekipet nga Kosova kanë konfirmuar pjesëmarrjen dhe kanë pritur hapat e mëtejmë të Ligës Unike, organizatë e përbashkët kjo që drejtohet nga FSHB-ja dhe FBK-ja. Shorti u shty dhe telashe tjera kishte rrugës.
Spektaklin e Superkupës Mbarëkombëtare në Mitrovicë e zbehu pak mungesa e Teutës në gjysmëfinale. Klubi durrësak vetëm hoqi dorë nga ai aktivitet dhe kështu Tirana shkoi direkt në finale. Në finale nuk i bëri fare rezistencë Trepçës. Nëse vazhdon Liga Unike, ajo pritet të dominohet plotësisht nga klubet kosovare. Aktualisht ato nuk kanë konkurrencë nga klubet e Shqipërisë. Dhe me gjithë anën “patriotike” të ligës, ka shumë në Kosovë që tashmë vlerësojnë se kuptimi i kësaj “gare” po humb gradualisht.
© KOHA. Të gjitha të drejtat janë të rezervuara.
