Trajneri Carlo Ancelotti mbrojti Karim Benzema nga akuzat se ai nuk po luan me Real Madridin për të qenë gati për Kupën e Botës, duke thënë të mërkurën se vetë sulmuesi francez është i mërzitur për mungesën e minutave në prag të turneut në Katar. 34-vjeçari Benzema, i cili është përballur me lodhjen e muskujve, do të humbasë ndeshjen e tij të gjashtë rresht kur Real Madridi do të presë Cadizin në kuadër të ligës spanjolle të enjten. Kjo do të jetë ndeshja e fundit e klubit para pushimit të Kupës së Botës. Ancelotti tha se ishte “marrëzi” që njerëzit të thoshin se Benzema po përpiqej të ruhej për Përfaqësuesen e Francës. Benzema nuk është përfshirë fare në ekip për ndeshjen që Reali e luan ndaj Cadizit.
“Është një sëmundje e vogël dhe Karim është përpjekur të shërohet prej saj”, tha trajneri i Real Madridit. “Ai është i pari që është i frustruar me situatën, pasi po hyn në Kupën e Botës pa minutat që do t'i duheshin për të qenë në gjendje më të mirë”.
Që kur fitoi “Topin e Artë” për lojtarin më të mirë të vitit tre javë më parë, Benzema humbi ndeshjet kundër Sevillas, Leipzigut, Gironas dhe Rayo Vallecanos. Ai luajti më pak se 30-të minuta pasi u inkuadrua nga banka e rezervistëve në fitoren 5:1 të Real Madridit ndaj Celticut në fazën e grupeve të Ligës së Kampionëve këtë muaj. Ndeshja e tij e fundit si titullar, ishte në fitoren 3:0 në Elche në ligën spanjolle më 19 tetor, kur ai shënoi golin e tij të fundit.
“E vetmja gjë që më shqetëson është se Karimi nuk ka qenë në gjendje të ndihmojë ekipin me cilësinë e tij”, tha Ancelotti.
Benzema do të rikthehet në Kupën e Botës pasi humbi turneun e vitit 2018 në Rusi. Përzgjedhësi i Francës, Didier Deschamps, e ka përfshirë Benzeman në listën e shpallur të mërkurën për Botërorin e Katarit, në të cilin do të përpiqet ta mbrojë titullin e fituar para katër vjetësh. Franca bën pjesë në Grupin D, ndërsa ndeshjen e parë në këtë fazë do ta luajë kundër Australisë më 22 nëntor. Në dy ndeshjet tjera, do të përballet edhe me Danimarkën (26 nëntor) e Tunizinë (30 nëntor). Ancelotti gjithashtu mbrojti edhe brazilianin Vinicius Junior nga akuzat se ai po provokonte shumë lojtarët tjerë në ndeshjet e fundit.
“Vini është lojtari që merr më shumë faulle”, tha Ancelotti për sulmuesin që do të jetë me Brazilin në Kupën e Botës.
Real Madridi duhet të mposhtë Cadizin e kërcënuar me rënie për të hyrë në pushimin e Kupës së Botës me tri pikë më pak se Barcelona që tani prin në La Liga. Real Madridi është kampion në fuqi si në ligën spanjolle, ashtu edhe në Ligën e Kampionëve.
