Për herë të parë në 15 vjet, Uruguai po planifikon një Kupë Botërore pa “maestron”. Oscar Tabarez, trajneri 75-vjeçar që drejtoi përfaqësuesen në tri edicionet e mëparshme të turneut, është jashtë. Zëvendësuesi i tij është 47-vjeçari Diego Alonso, një trajner me pak përvojë, i cili pritet të besojë te sulmuesit veteranë Edinson Cavani dhe Luis Suarez.

Alonso mori përsipër ekipin nga Tabarezi këtë vit, pas një serie rezultatesh të dobëta në kualifikimet e Amerikës së Jugut. Ndryshimi e ndihmoi Uruguain të siguronte një vend në Kupën e Botës, por gjithashtu preu një lidhje familjare midis trajnerit dhe lojtarëve të tij, duke përfshirë disa që e çuan Uruguain në gjysmëfinalen e Kupës së Botës në vitin 2010.

“Ne nuk e krahasojmë veten me askënd, ose me ekipet e Kupave të Botës të mëparshme, ose me atë që ka ndodhur më parë”, tha Alonso së fundmi. “Ne shpresojmë vetëm për më të mirën sepse kjo është ajo që duam, kjo është dëshira jonë”.

Uruguai do të luajë në Grupin H në turneun në Katar, ku do të përballet me Korenë e Jugut, Portugalinë dhe Ganën.

Më shumë ndryshime

Alonso nuk hezitoi të ndryshonte formacionin fillestar të Uruguait pasi mori drejtimin nga Tabarezi, një njeri i njohur në Uruguai si “maestro”. Pas disa rezultateve të tmerrshme në kualifikime, ai zëvendësoi portierin veteran Fernando Muslera me Sergio Rochet. Trajneri i ri zgjodhi gjithashtu 24-vjeçarin Mathias Olivera si mbrojtës të majtë. Që atëherë, Uruguai ka pranuar më pak gola. Alonso u ka dhënë më shumë liri mesfushorëve Rodrigo Betancur dhe Federico Valverde, gjë që po lejon të shkëlqejë anësori 20-vjeçar Facundo Pellistri, një tjetër lojtar i zgjedhur nga Alonso.

Darwin Nunez, sulmuesi 23-vjeçar i transferuar së fundmi nga Liverpooli, me siguri do të luftojë për vend në ekip. Valverde dhe mbrojtësi Ronald Araujo kanë edhe më shumë gjasa të luajnë në Katar sepse Alonso i sheh ata si pjesë të së ardhmes së ekipit. Valverde, i cili është 24 vjeç, duhet të luajë një rol të ri me Uruguain. Në vend që të fokusohet te mbrojtja, ai po shënon gola nga distanca dhe po ndihmon me asistime. 23-vjeçari Araujo mund të përshtatet në çdo pozicion në mbrojtjen e Uruguait. Pas kthimit nga lëndimi, Araujo është përfshirë në listën preliminare.

Suarez dhe Cavani

Suarez dhe Cavani janë 35-vjeçarë. Të dy do të luajnë në Botërorin e katërt dhe sipas të gjitha gjasave të fundit. Dy golashënuesit më të mirë të Uruguait, të cilët do të përballen me konkurrencë të madhe për të mbetur në ekip, kanë marrë rrugë të ndryshme për të siguruar vendet e tyre. Suarez u kthye në shtëpi për të luajtur për ekipin e fëmijërisë Nacional, gjë që e bëri atë edhe më hero uruguaian për shumë tifozë. Ai shënoi tetë gola në 16 ndeshje. Cavani u largua nga Manchester Unitedi, ku ishte kryesisht në stol, për te klubi spanjoll Valencia. Ai ka shënuar katër gola në shtatë ndeshje të luajtura në Spanjë. Në Kupën e Botës, Suarez ka shënuar gjithsej shtatë gola. Kjo është një më pak se mbajtësi i rekordit të Uruguait, Oscar Miguez, i cili luajti në ekipin fitues të vitit 1950.