Sport

Një medalje bronzi në rrugën e Norës drejt kthimit në kulm

Nora Gjakova ka bërë edhe një hap drejt kthimit në nivelin më të lartë të xhudos. Dhe ka zënë edhe një vend në podium.

Të premten Nora fitoi medaljen e bronztë në Grand Slamin që po mbahet në Baku të Azerbajxhanit. Nora ishte bartësja e parë dhe vlerësohej pretenduese e madhe për medalje të artë. Por, përfundoi e treta, rezultat që duhet vlerësuar marrë për bazë momentin.

Nora është kthyer në gara më 21 tetor, pasi mungoi plot 15 muaj. Në Grand Slamin e Abu Dabit fitoi medalje të argjendtë.

Ajo nuk kishte garuar që nga Lojërat Olimpike të Tokios, ku kishte fituar të artën. Në Tokio ka garuar në fund të korrikut të vitit të kaluar. Ndërkohë i është nënshtruar një operimi në krah dhe tani po e kërkon formën më të mirë.

Hap para drejt formës më të mirë ka bërë të premten në Azerbajxhan.

Nora në raundin e parë ishte e lirë. Në raundin e dytë e mposhti gjermanen Seija Ballhaus. Ndaj saj fitoi me dy uazari. Në çerekfinale Nora u befasua nga britanikja Lele Nairne. Britanikja realizoi herët hedhje për uazari, ndërsa më pas Nora bëri përpjekje për të realizuar aksion. Megjithëse sulmoi deri në fund, nuk ia doli ta përmbyste rezultatin. Kështu i mbetej që të kërkonte përmes repesazhit medaljen e bronztë.

Në luftën e parë të repesazhit e mposhti italianen Veronica Toniolo. Dhe për medalje të bronztë e mposhti belgen Mina Libeer. Belgia pësoi tri dënime dhe kështu Nora Gjakova fitoi me Ippon.

“Çdo luftë e Norës ka treguar që lëndimi ka ndikuar dukshëm, në shumë drejtime. Por vullneti i saj i hekurt për rikthim tashmë po jep fryte dhe në dy gara i ka dy medalje. Ajo sot fitoi 490 pikë të rëndësishme olimpike”, ka shkruar trajneri i Kosovës në xhudo, Driton Kuka.

Të dielën në Baku të Azerbajxhanit garon Loriana Kuka.

Të premten në këndin e Norës ka qëndruar Majlinda Kelmendi. Trajneri Driton Kuka po i jep asaj përgjegjësi gjithnjë e më të mëdha.

Kanadezja Christa Deguchi fitoi të artën në kategorinë deri 57 kg. Të argjendtën e fitoi Telma Monteiro e Bullgarisë, kurse të bronztë fitoi edhe bullgarja Ivelina Ilieva.