Ndeshja e mbetur e xhiros së katërt të Superligës së Kosovës, ndërmjet Prishtinës dhe Dritës ka përfunduar pa fitues.
Dueli i luajtur të mërkurën mbrëma në stadiumin “Fadil Vokrri” është mbyllur me rezultatin 0:0.
Ndeshja nuk pati shumë raste, por si Prishtina ashtu edhe Drita kanë mundur të shënojnë. Rastin më të mirë në këtë ndeshje e lëshoi Blend Baftiu i Dritës.
Gjuajtjen e tij me kokë në minutën e 80-të, e dëboi portieri Ardit Nika.
Me këtë pikë të fituar, Drita forcohet në krye të tabelës me 18 pikë, gjashtë më shumë se Prishtina që renditet e katërta.
Në fakt, Drita mbetet ekipi i vetëm këtë edicion në Superligë që nuk ka pësuar humbje pas tetë xhirove të zhvilluara. Ka pesë fitore e tri barazime.
19:50
Mbyllet pa gola pjesa e parë e derbit Prishtina-Drita
Ka përfunduar pa gola pjesa e parë ndërmjet Prishtinës dhe Dritës.
Kjo është ndeshje e mbetur e xhiros së katërt të Superligës dhe po zhvillohet në stadiumin “Fadil Vokrri” në Prishtinë, në një atmosferë fantastike të krijuar nga tifozët.
Gjatë 45 minutave të para, asnjëra prej skuadrave nuk ka regjistruar ndonjë rast të mirë shënimi.
Futbollistët kryesisht kanë luajtur në mesfushë dhe janë treguar maksimalisht të kujdesshëm.
Drita është lidere e Superligës, ndërsa Prishtina renditet e katërta.
