Trajneri Luis Enrique u përpoq të qëndronte optimist për shanset e Spanjës për të avancuar në fazën finale të Ligës së Kombeve, pas humbjes zhgënjyese në shtëpi nga Zvicra. Spanja ende mund të sigurojë një vend në finalet e Ligës së Kombeve, por i duhet fitorja në udhëtim te Portugalia, të martën mbrëma (20:45).
“Është një finale dhe ne do të shkojmë atje për të provuar ta fitojmë atë. Duhet ta fitojmë këtë ndeshje të rëndësishme pasi synimi është të avancojmë tutje në këtë garë”, insistoi Luis Enrique të hënën.
Humbja 2:1 e së shtunës nga Zvicra e zhvendosi Spanjën në pozitën e dytë në Grupin 2 të Ligës A, përpara ndeshjes vendimtare ndaj Portugalisë që luhet në Braga. Portugalia i prin grupit me dhjetë pikë e ndjekur nga Spanja me tetë. Ndeshja në Braga është e fundit.
Mposhtja e Portugalisë nuk është diçka që Spanja ka mundur ta bëjë kohët e fundit. Fqinjët iberikë kanë barazuar në katër ndeshjet e fundit dhe Spanja nuk ka fituar në Portugali për gati dy dekada. Fitorja e saj e fundit kundër Portugalisë erdhi pas penalltive në gjysmëfinalen e Kampionatit Evropian të vitit 2012. Më parë fitoi në 1/8 e finales të Kampionatit Botëror të vitit 2010, në një ndeshje ku Portugalia u ankua për një pozicion jashtë loje në golin e fitores të David Villas.
Spanja nuk di për fitore në Portugali që nga viti 2003. Pati triumfuar 3:0 në ndeshje miqësore, në të cilën debutimin te Spanja e bëri sulmuesi Fernando Torres, jo shumë kohë pasi Cristiano Ronaldo filloi të luante për Portugalinë. Ekipet kanë barazuar katër herë rresht qëkur trajneri Fernando Santos mori drejtimin e Portugalisë pas Kupës së Botës të vitit 2014. Spanja ka nevojë për fitore, pasi serinë e saj prej 22 ndeshjeve pa humbje ia ndërpreu Zvicra në Zaragoza.
Portugalia fitoi 4:0 në Çeki për të zënë vendin e parë në grup dhe për të fituar një shans për të avancuar në fazën finale të Ligës së Kombeve edhe me një barazim të martën. Në fazën finale katër fituesit e grupeve në Ligën A garojnë për titull të kampionit.
“Qëllimi ynë do të ishte i njëjtë edhe nëse Spanja nuk do të kishte humbur. Ne do të përpiqemi të fitojmë ndeshjen në Braga”, tha mbrojtësi i Portugalisë, Diogo Dalot, i cili shënoi dy herë kundër Çekisë. “Do të jetë një ndeshje e komplikuar, por ne do të bëjmë më të mirën për të kaluar në plejof”.
Faza finale e Ligës së Kombeve luhet qershorin e ardhshëm.
Zvicra ka gjashtë pikë, dy më shumë se Çekia, përpara ndeshjes së tyre në St. Gallen. Çekisë i duhet fitorja për të shmangur rënien në Ligën B.
Spanja po kërkon paraqitjen e dytë radhazi në “Final Four” pasi përfundoi nënkampione vitin e kaluar. Edicionin e kaluar të Ligës së Kombeve i duhej edhe një fitore e xhiros së fundit për të kaluar në “Final Four” dhe atë e arriti duke tronditur Gjermaninë me shifrat 6:0.
Luis Enrique tha se nuk pret të ketë shumë ndryshime në skuadër për ndeshjen kundër Portugalisë, pavarësisht humbjes të shtunën. Ai pranoi se skuadra duhet të paraqitet më mirë në mbrojtje dhe jo sikurse ndaj Zvicrës kur pranoi dy gola që kanë mundur të evitoheshin.
“Besoj se këtë herë do të tregohemi më të kujdesshëm përballë Portugalisë. Kemi punuar gjatë këtyre ditëve për ta përmirësuar më shumë mbrojtjen, e cila pres se do të jetë në nivel të detyrës”, theksoi Enrique.
Portugalia, fituesja e edicionit inaugurues të Ligës së Kombeve në vitin 2019, mund të shohë rikthimin e sulmuesit Joao Felix, i cili nuk ishte në dispozicion për ndeshjen kundër Çekisë për shkak të një dëmtimi. Ai iu bashkua shokëve në stërvitje të dielën.
© KOHA. Të gjitha të drejtat janë të rezervuara.
