Për të ardhmen e Edoardo Rejës po diskutohet thuajse më shumë se për ndeshjen që Shqipëria e luan të martën ndaj Islandës. Për kuqezinjtë është ndeshja e fundit në kuadër të Grupit 2 të Ligës B të Ligës së Kombeve. Kampanja në edicionin e tretë të Ligës së Kombeve ishte e pasuksesshme. Shqipëria ka kërkuar vendin e parë në grup dhe promovimin në Ligën A, por Izraeli ishte bindshëm më i mirë.
Izraeli ka fituar dy ndeshjet me Shqipërinë dhe tashmë ka siguruar vendin e parë në grupin me tri përfaqësuese. I ka tetë pikë nga katër ndeshje. Islanda i ka tri pikë nga tri ndeshje, ndërsa Shqipëria e ka një pikë nga tri ndeshje. Në Grupin B2 është dashur të jetë edhe Rusia, por ajo u pezullua. Kështu Rusia bie në Ligën C për edicionin e ardhshëm, ndërsa Shqipëria e Islanda luftojnë për vendin e dytë në grup.
Ndeshja Shqipëri – Islandë luhet të martën nga ora 20:45 në “Air Albania” në Tiranë. Shqipëria kërkon të reagojë pas humbjes 2:1 nga Izraeli, të shtunën.
Reja në konferencën për shtyp ka thënë se është i fokusuar te ndeshja me Islandën e jo tek e ardhmja e tij në krye të Shqipërisë.
“Unë shpresoja që në këtë kampanjë të rriteshim. Disa miqësore kanë shkuar mirë. Prisja rritjen e cilësisë, por për fat të keq duhet të diskutojmë përsëri për gabimet individuale. Kundërshtarët i kanë shfrytëzuar shumë mirë gabimet tona. Nëse duam të rritemi duhet të jemi bashkë. Gabimet ndaj Izraelit ishin të shumta”, ka thënë Reja në konferencën për shtyp të mbajtur të hënën.
Tekniku italian ka paralajmëruar ndryshime në formacion dhe në ekip. Përzgjedhësi i Shqipërisë, Reja, ka thënë se ekipi demoralizohet kur pranon gol dhe nuk reagon.
Ai është pyetur edhe për të ardhmen si përzgjedhës i Shqipërisë.
“Nuk po mendoj për këtë tani. Mendoj vetëm për Islandën, jo për të ardhmen. Unë mendoj vetëm për këtë ndeshje, pas Islandës ka kohë që të mendoj për të ardhmen. Ajo që ka rëndësi është kjo ndeshje. Pastaj vetëm Zoti e di atë që do të ndodhë”, ka theksuar Reja.
Ai ka theksuar se nuk ndikohet nga kritikat, porse ato më vështirë i pranojnë lojtarët.
Reja është optimist para ndeshjes me Islandën.
“Nëse luajmë me vendosmëri, përkushtim dhe karakterin e duhur është e qartë se mund të fitojmë. Është po ashtu e qartë se nuk duhet të bëjmë gabimet që po na ndodhin shpesh. Duhet të luajmë me besim në aftësitë që kemi, jo të fokusuar tek ajo që ndodhi. Duhet të jemi shumë të qetë. Ndaj Islandës duhet karakter i fortë. Islandezët janë të aftë fizikisht dhe kanë karakter të fortë po ashtu. Por ne duhet të dominojmë në këtë aspekt”, ka theksuar Reja.
Në konferencë për shtyp ka folur edhe sulmuesi Sokol Çikalleshi. Ai e di që për fitore ndaj Islandës ekipi nuk duhet t’i bëjë gabimet e shfaqura ndaj Izraelit. Çikalleshi ka bërë thirrje që ekipi të jetë i bashkuar.
“Situata nuk është e mirë, por ne do të tentojmë ta fitojmë ndeshjen. Vetëm të bashkuar mund të arrijmë sukses. Eliminatoret e Evropianit janë afër dhe është e rëndësishme të jemi bashkë edhe me tifozët”, ka thënë Çikalleshi. “Është një ndeshje që mund ta fitojmë. Të rregullojmë detajet dhe t’ia lëmë fushës. Është një ndeshje për moral, për të treguar që mund të ringrihemi, që Kombëtarja të jetë aty ku e meriton”, ka shtuar sulmuesi Sokol Çikalleshi.
Në Reykjavik, Islanda e Shqipëria kishin barazuar 1:1, më 6 qershor. Islanda ka barazuar dy herë edhe me Izraelin.
© KOHA. Të gjitha të drejtat janë të rezervuara.
