Ylli ndalet në Champions, vazhdon në FIBA Europe Cup
23:53
Ylli ndalet në Champions, vazhdon në FIBA Europe Cup
Kampioni i Kosovës në basketboll, Golden Eagle Ylli nuk ka pasur debutim të suksesshëm në Ligën e Kampionëve. Të mërkurën mbrëma në Portugali, skuadra suharekase është mposhtur thellë nga Benfica, me rezultatin 92:67. Kështu Ylli u ndal në çerekfinale të fazës kualifikuese. Tani zhvendoset në fazën grupore të FIBA Europe Cup, që është nivel më i ulët. Ylli është dashur të kalojë tre kundërshtarë për të arritur në fazën grupore të Championsit.
Por është ndalur nga i pari. Në fakt Ylli edhe është vlerësuar autsajder ndaj Benficas, që ka angazhuar lojtarë cilësorë së fundi. Suharekasit megjithatë e nisën më mirë ndeshjen. Çerekun e parë e fituan me rezultatin 19:14. Të barabartë ishin edhe në çerekun e dytë, ndërsa në pushim skuadrat shkuan me rezultatin 42:42. Por dallimi u bë në pjesën e dytë, përkatësisht në çerekun e tretë. Në shprehje erdhi fondi më i madh i lojtarëve të Benficas dhe numri i limituar i lojtarëve në të cilët llogariste trajneri i Yllit, Adis Beqiragiq. Për shkak të lëndimeve ai nuk ka mundur të llogarit në Gëzim Morinën dhe Malcolm Armsteadin.
Kështu barrën e kanë bartur gjashtë lojtarë, derisa te Benfica hapësirë kishin të gjithë 12 lojtarët. Ylli ka aktivizuar tetë lojtarë gjithsej. Më i miri ishte Ahmed Bashir me 27 pikë, katër kërcime e tri asistime. Chris Harris realizoi nëntë pikë e plot 14 kërcime.
Valon Bunjaku shtoi 15 pikë, ndërsa Henrik Shirko i kishte 10 pikë. Te Benfica përgjegjësia ishte e shpërndarë. Janë dalluar Jose Barbosa me 15 pikë dhe Terrell Carter me 15 pikë e pesë kërcime.
23:01
Ylli po barazon me Benfican
Kampioni i Kosovës në basketboll, Golden Eagle Ylli po shfaq ndeshje të madhe ndaj Benficas në Portugali.
Ndonëse sipas FIBA-s, Benfica ishte favorite e madhe, Ylli ka qenë rival i barabartë deri më tani i kampiones portugeze.
Ylli e ka fituar çerekun e parë me rezultatin 19:14, ndërsa është mbajtur edhe në të dytin.
Pas 20 minutave lojë rezultati është 42:42.
Ylli po luan pa Gëzim Morinën dhe Malcolm Arsteadin, që janë të lënduar.
Është kjo ndeshja çerekfinale e fazës kualifikuese të Ligës së Kampionëve.
