Sejdiu shënon në fitoren e Malmos

Patriot Sejdiu ka shënuar golin e katërt të sezonit në elitën e futbollit të Suedisë.

Sejdiu të dielën me Malmon fitoi në udhëtim te Helsingborgu me rezultatin 2:1.

Ishte ndeshje e xhiros së 23-të të “Allsvenskas” suedeze, ndërsa ballafaqimi llogaritet si derbi më i zjarrtë në këtë kampionat.

Sejdiu e realizoi golin e epërsisë në minutën e 17-të të ndeshjes. Futbollisti nga Kosova kishte shënuar edhe në fund të muajit qershor në këtë derbi dhe për këtë ndihet krenar.

“Dy ndeshje, dy gola. Është e veçantë kur shënon në derbi”, ka thënë pas ndeshjes Sejdiu.

Sejdiu luajti deri në minutën e 77-të.

Te vendësit nga minuta e 70-të u inkuadrua në lojë sulmuesi 25-vjeçar, Arian Kabashi.