Sport

Lewandowski po e shpreh zemërimin edhe në stërvitje

Në mënyrë të shëmtuar po përfundojnë tetë vjetët fenomenale të Robert Lewandowskit te Bayern Munichu.

Pas 375 ndeshjeve, 344 golave të shënuar, 72 asistimeve dhe të gjithë trofeve të fituar, ai publikisht po lufton me klubin sepse dëshiron të transferohet te Barcelona dhe Bayerni nuk po e lë të lirë.

Më saktësisht, Bayerni nuk dëshiron që ta lërë të lirë atë për më pak se 50 milionë euro. Lewandowski dhe Barcelona besojnë se duke marrë parasysh moshën e tij 33-vjeçare, të arriturat te Bayerni dhe fakti se kontrata e tij skadon në verën e vitit tjetër, ai e meriton të lirohet me dëmshpërblim më të vogël.

Dhjetë ditë më parë, Bayerni e refuzoi ofertën e tretë zyrtare të Barcelonës, edhe pse ishte më e lartë se dy të parat. Megjithatë, 40 milionë eurot dhe pesë të tjerat në bazë të paraqitjeve e bonuseve dolën të jenë të pamjaftueshme për Bayernin.
Gazeta gjermane “Bild” dhe njohësi i transferimeve evropiane, Fabrizio Romano, kanë shkruar se Bayerni do ta pranonte vetëm ofertën 50 milionë eurosh, e ajo të jetë fikse.

Lewandowski ka kaluar në vepra

Polaku Lewandowski është shumë i zemëruar me qëndrimin e Bayernit.

“Kaq shumë vjet të kaluara te kjo skuadër dhe gjithmonë i gatshëm për lojë, pavarësisht lëndimeve dhe dhimbjeve, kam dhënë gjithmonë më të mirën. Gjëja më e mirë është që të gjendet zgjidhje për të dyja skuadrat dhe të mos ketë insistim nga njëra skuadër. Nuk ka fare kuptim, jo pas kaq shumë vjetëve. Do ta kuptoja nëse do të isha te Bayerni për dy apo katër vjet, por pas kaq shumë vjetëve, me trofe të fituar me ndihmën time, gjithmonë i gatshëm e me vullnet të mirë, me respekt e besnikëri, do të duhej të ishte më e rëndësishme sesa biznesi”, ka thënë Lewandowski, shkruan sajti kroat “index.hr”.

Nuk flet me bashkëlojtarë, injoron trajnerin

Atë që saktësisht e ka thënë me fjalë, Lewandowski tani po e konfirmon edhe me veprime në seancat stërvitore të Bayernit, të cilave iu bashkua të mërkurën.

“Gjuha e trupit të tij tregon se ai dëshiron të largohet. Ai ishte me vonesë në takim me ekipin dhe më pas u shfaq në stërvitje i fundit. E niste çdo ushtrim i fundit. Ai i kryente ato, por jo me vullnet”, shkruan gazeta gjermane “Bild”.

“Ai me vështirësi u fliste bashkëlojtarëve. I vetmi me të cilin foli ishte Leon Goretzka. Ai nuk pati kontakt me trajnerin Julian Ngaelsmann. Nuk folën. Kur Nagelsmann fliste para lojtarëve, Lewandowski nuk dukej i interesuar. Ai shikonte anash. Në një ndeshje brenda grupit, ai ishte në ekipin e parë”, shton tutje gazeta gjermane.

Skuadra e tij humbi dhe duhej të bënte “pompa”, Lewa nuk i bëri

“Ai nuk provonte, nuk shkonte drejt topit dhe nuk shënoi asnjë gol. Skuadra e tij humbi dhe lojtarët duhej të bënin ‘pompa’, por Lewandowski nuk bëri një gjë të tillë”, sqaron “Bildi”.

Lewandowski u largua nga qendra stërvitore 22 minuta pasi përfundoi stërvitja, shumë më herët sesa lojtarët e tjerë të skuadrës.

E një video e Lewandowskit, e incizuar nga qendra stërvitore, nuk është pritur aspak mirë nga tifozët e klubit. Ata kanë thënë se golashënuesi i jashtëzakonshëm i skuadrës është skandaloz.

Thomas Muller, Sadio Mane, Gabriel Vidoviq dhe Leroy Sane ishin në grupin e parë të sulmuesve, prej të cilëve trajneri Nagelsmann kishte kërkuar presing të lartë. E kishte kërkuar edhe nga Lewandowski, por ai nuk i është përgjigjur kërkesës së tij. Kjo katërshe ka bërë presion në Serge Gnabryn, Jamal Musialan, Kingsley Comanin dhe Joshua Zirkzeen, shkruan gazeta gjermane. Por, Lewandowski ishte i vetmi sulmues që nuk ka reaguar. Ai kishte qëndruar në pjesën tjetër të fushës dhe kishte shikuar.