Ardon Jashari do të jetë me kontratë te skuadra e Luzernit deri më 30 qershor të vitit 2026.
Lajmi u bë i ditur të mërkurën nga skuadra e elitës së futbollit zviceran në sajtin zyrtar.
Kontrata paraprake e mesfushorit 19-vjeçar, skadonte në vitin 2025.
“Është një shenjë pozitive që Ardoni e ka vazhduar kontratën me ne edhe për një sezon tjetër”, ka thënë drejtori sportiv i Luzernit, Remo Meyer.
Ndërkohë, i lumtur për vazhdimin e kontratës është shprehur edhe vetë futbollisti i talentuar.
“Jam shumë i lumtur me shansin që më ka dhënë Luzerni. Jam i sigurt se do të mund të jap paraqitje të mira dhe dua të jem pjesë e sukseseve të ekipit”, është shprehur Jashari.
Në sezonin që përfundoi, Jashari luajti në 34 ndeshje në të gjitha garat. Realizoi 5 gola dhe shtoi tri asistime.