Dortmundi e ka emëruar Edin Terziqin si trajner për sezonin e ardhshëm, duke i besuar ish-menaxherit të përkohshëm që të marrë drejtimin pas shkarkimit të Marco Roses javën e kaluar.
39-vjeçari Terziq, i cili kaloi sezonin e kaluar si drejtor teknik i klubit, do të nënshkruajë një kontratë të martën për të marrë detyrën e trajnerit të ekipit të parë deri në qershor 2025, thuhet në njoftimin e Dortmundit të hënën.
“Ne mbajtëm disa diskutime intensive me Edin Terziqin fundjavën e kaluar dhe jemi të bindur se ky vendim është i duhuri për BVB-n”, tha drejtori sportiv i ardhshëm i Dortmundit, Sebastian Kehl. “Edini e njeh klubin tonë, mjedisin, një pjesë të madhe të ekipit dhe zonat që do të donim të rregullonim për të qenë në gjendje të ofrojmë futboll të suksesshëm për tifozët tanë”. Kehl tha se sezoni i ardhshëm është një “fillim i ri sportiv” për Dortmundin.
Terziqi e udhëhoqi Dortmundin drejt triumfit në Kupën e Gjermanisë dhe kualifikimit në Ligën e Kampionëve vitin e kaluar, pasi ai mori drejtimin e ekipit përkohësisht nga i shkarkuari Lucien Favre. Atëbotë, Dortmundi kishte rënë dakord që trajneri i atëhershëm i Borussia Moechengladbachut, Rose, të merrte drejtimin pas përfundimit të sezonit dhe Terziq u largua. Rose nuk i përmbushi pritshmëritë me Dortmundin që pësoi largime të hershme në Kupën e Gjermanisë, Ligën e Kampionëve dhe më pas Ligën e Evropës, po ashtu ekipi nuk mund ta sfidonte Bayernin në Bundesligë.
Emërimi i Terziqit vjen pasi klubi ka bërë tashmë katër përforcime të reja për sezonin e ardhshëm – mbrojtësit Niklas Suele e Nico Schlotterbeck, sulmuesin Karim Adeyemi dhe mesfushorin Salih Ozcan.
© KOHA. Të gjitha të drejtat janë të rezervuara.
