Sulmuesi i Malmos, Patriot Sejdiu, e luajti të hënën ndeshjen e parë si startues në “Allsvenskan”, kampionatin elitar të Suedisë. Por 22-vjeçari është ndarë i dëshpëruar pas ndeshjes me Djurgardenin.
Malmo pësoi 4:0 në kuadër të xhiros së tetë të kampionatit suedez.
Ishte disfata më e thellë e Malmos që prej vitit 2012, kur u mposht në shtëpi nga Hackeni, 5:0.
Për herë të parë në katër vjet, Malmo pësoi dy disfata të njëpasnjëshme në kampionat.
Më 11 maj humbi në udhëtim nga AIK-u, 2:0. Sejdiu në atë ndeshje u aktivizua në pjesën e dytë.
“Nëse do të ishim më shumë të bashkuar, mendoj se do të mund të fitonim”, ka thënë sulmuesi i krahut të djathtë për “fotbollskanalen” të martën.
“Debutimi im si titullar ishte i mirë. E kam pritur një gjë të tillë, por nuk jam i lumtur për shkak të disfatës. Gjithçka shkoi keq, sepse pësuam disfatë. Asnjë lojtar nuk mund të jetë i mirë apo i keq individualisht. Ne fitojmë ose humbim si ekip”, ka shtuar Sejdiu.
Kosovari ishte aktiv në këtë ndeshje duke fituar disa duele.
“Është gjë e mirë kur përfshihem në lojë, por ne përsëri nuk morëm ndonjë pikë, nuk përfituam diçka”, ka thënë ai.
Ndryshe ka menduar trajneri i Malmos, Millosh Milojeviq, i cili e ka përgëzuar Sejdiun pas ndeshjes. Në konferencën për shtyp ai ka thënë se 22-vjeçari ishte më i miri te Malmo.
“Gjuha e tij e trupit thoshte se ai dëshiron të luajë në këtë ndeshje dhe se ai donte të bënte diçka të mirë. Ai donte të bënte gjëra të mira për skuadrën tonë”, ka thënë trajneri i gjigantit suedez.
Sejdiu në të kaluarën ka pasur numër të madh të lëndimeve. Kishte operim në gjoks, pësoi aksident e pati lëndim të rëndë në gju. Por Malmo ka besuar në cilësitë e tij. Në muajin nëntor u shpërblye me kontratë profesionale nga Malmo për tre vjet.
© KOHA. Të gjitha të drejtat janë të rezervuara.
