Zuerichu është në prag të titullit të kampionit në Zvicër. Pesë xhiro para fundit të edicionit udhëheq me 69 pikë, 13 më shumë se Baseli i vendit të dytë. Zuerichu e Baseli kanë rivalitet të madh, ndërsa dy skuadrat të dielën takohen në stadiumin e Baselit. Zuerichut i mjafton një pikë për ta fituar titullin e kampionit.
Derisa Taulant Xhaka ka thënë se Baseli do të bëjë të pamundurën që të shtyjë festën e Zuerichut, shqiptarët e shumtë të skuadrës lidere kanë plane të tjera.
Futbollistët shqiptarë kishin rol shumë të madh në kampanjën e suksesshme të Baselit. Mbrojtja u është besuar thuajse në tërësi shqiptarëve, ndërsa rol të madh në mesin e fushës ka Blerim Xhemaili. Në fakt Xhemaili vlerësohet i rëndësishëm për gjithë skuadrën dhe gjithë klubin për shkak të përvojës së tij.
Në vitin 2006, Xhemaili ishte pjesë e Zuerichut që siguroi titullin e kampionit pikërisht në stadiumin e Baselit. Ish-reprezentuesi i Zvicrës e mban shumë mirë në mend atë ndeshje.
“Gjëja e parë që më vjen në mend është minuta e 93-të kur Iulian Filipescu shënon për 2:1 dhe ne të gjithë vrapojmë në drejtim të tij. Nuk do ta harroj asnjëherë atë moment”, ka thënë Xhemaili në një intervistë për “Blick”.
“E kujtoj atë ditë që nga momenti kur u vendosëm në autobus. Kishte diçka në ajër, pasi tri ditë më parë Baseli lëshoi pikë në garën për titull. Ne fituam shansin në të cilin gati askush nuk besonte. E di që nuk kemi luajtur mirë në ndeshje, ndonëse kemi udhëhequr herët. Në minutat e fundit nuk kam besuar në golin e fitores, por ai erdhi. Fati deshi që Zuerichu të bëhet kampion atë ditë”, ka shtuar Xhemaili.
Zuerichu ka 12 tituj të kampionit. Ai titull i vitit 2006 ishte i pari që nga viti 1981. Më pas doli kampion edhe në vitin 2007 dhe 2009.
Xhemaili ishte në skuadër edhe në vitin 2007, ndërsa më pas karrierë të suksesshme ka bërë në vende të tjera, kryesisht në Itali. Dhe në fund të karrierës vendosi të kthehej te Zuerichu, te skuadra e fëmijërisë. Po e fiton një tjetër titull.
Pas atij titulli të siguruar në Basel, kishte pasur trazira në stadium. Por Xhemaili nuk ka dëshirë të flas për to. Ai thotë se në aspektin emocional titulli i parë ishte i njëjtë me ditën kur iu tha se do të luante për ekipin e parë të Zuerichut. Të dy gjërat ishin të papritura për Xhemailin. Ai menjëherë në verën e vitit 2006 ishte ftuar për në Botëror dhe nga lojtar thuajse anonim u bë shumë i njohur në Zvicër.
Xhemaili ka thënë se te Zuerichu nuk ka presion.
“Nëse e fitojmë në Basel mirë. Por presioni nuk është te ne. Ne kemi pesë ndeshje, jo domosdoshmërit duhet të përfundojmë gjërat në ndeshjen e parë. Ndonëse edhe një pikë është e mjaftueshme, ne do të luajmë për fitore në Basel. Por të ruajmë qetësinë do të jetë sfidë. Do të jetë ditë e veçantë, sidomos për njerëzit nga Zuerichu në ekipin tonë. Por unë nuk jam i brengosur për këtë. Ne kemi lojtarë të qetë dhe zero presion.
Xhemaili ka vlerësuar lart punën e trajnerit, ndërsa ka thënë se nuk e sheh veten në pozitën e trajnerit në të ardhmen. Ai do të marrë rol drejtues te Zuerichu, por jo në shtabin teknik.
Meritë e trajnerit është edhe stabilizimi në mbrojtje i Mirlind Kryeziut dhe Fidan Alitit. Përkrah tyre në ndeshjet e fundit po paraqitet Lindrit Kamberi. Zuerichu luan me tre mbrojtës pra që të gjitha shqiptarë aktualisht. Para tyre luan Xhemaili e në raste edhe Bledian Krasniqi.
Në aspektin financiar Zuerichu ende nuk mund të rivalizoi Young Boysin e Baselin, por në fushë këtë edicion ka dominuar ndaj tyre. Për meritë edhe të futbollistëve shqiptarë natyrisht.
© KOHA. Të gjitha të drejtat janë të rezervuara.
