Peja është kampione e Ligës Unike në basketboll. Në finale, të enjten mbrëma në “Karagaçi”, Peja e mposhti Golden Eagle Yllin me shifrat 87:72.
Ndeshja është luajtur në palestrën e stërmbushur dhe në atmosferë të zjarrtë.
Peja shkëputjen e nisi që në çerekun e parë, të cilin e fitoi me rezultatin 23:19. Pejanët ishin dominues edhe në periudhën e dytë, 26:15. Ndërkohë epërsinë e krijuar e mbajtën edhe në çerekun e tretë, të cilin e fituan me shifrat 20:19. Çereku i katërt vetëm konfirmoi fitoren e skuadrës së Pejës.
Ylli e fitoi periudhën e katërt, 19:18, por kjo as për së afërmi nuk ishte e mjaftueshme.
Ylli kishte fituar vjet Ligën Unike, por në finalen e së enjtes mbrëma ishte larg prej triumfit.
Peja në gjysmëfinale e kishte mposhtur Prizreni-16 me rezultat 98:94, ndërkohë Golden Eagle Ylli ishte skuadër më e mirë se Teuta e Durrësit, duke fituar 84:82.
Ndeshjet gjysmëfinale ishin dukshëm më me rivalitet se finalja.
Dardan Berisha ishte më efikasi te Peja me 22 pikë. Ai shtoi edhe katër kërcime e gjashtë asistime.
Darius Washington kishte statistikat më të mira. Ndeshjen e përfundoi me 13 pikë, nëntë asistime e pesë kërcime. Stephen Maxwell shtoi 16 pikë e 11 kërcime.
Tek Ylli u dallua Henrik Shirko me 17 pikë e 14 kërcime. Erion Kastrati realizoi 23 pikë.
Tani këto dy skuadra i kthehen garës për titull të kampionit në Superligën e Kosovës.
© KOHA. Të gjitha të drejtat janë të rezervuara.
