Ka pasur zhvillime të reja të hënën lidhur me ndeshjen e ndërprerë mes Gjilanit dhe Ballkanit. Por jo edhe vendim të organeve të FFK-së lidhur me këtë ndeshje.
Ndeshja e zhvilluar të dielën në stadiumin e qytetit në Gjilan u ndërpre në minutat shtesë për shkak të sulmit të rëndë fizik ndaj portierit të Ballkanit, Stivi Frashëri. Në momentin kur Gjilani barazoi rezultatin në 1:1, tifozë vendas kaluan nga tribuna në fushë për të festuar. Por dy huliganë sulmuan rëndë Frashërin. Njëri i erdhi nga prapa dhe e rrëzoi në tokë, ndërsa një tjetër e shkelmoi. Rasti ka bërë bujë, jo vetëm në Kosovë, ndërsa ndaj dy huliganëve që kryen sulmin është kërkuar paraburgim prej një muaji. Ata janë arrestuar të dielën mbrëma dhe fillimisht janë ndalur për 48 orë.
Ndeshja zyrtarisht është pezulluar, kur rezultati ishte 1:1. Tani për epilogun e ndeshjes do të vendosë Komisioni i Garave i FFK-së. Ky komision zakonisht mblidhet të martave, kur ndeshjet janë në fundjavë. Nëse nuk ka ndonjë rrethanë të jashtëzakonshme, kështu pritet të jetë edhe këtë herë. Shumë presin që ndeshja të regjistrohet 3:0 në të mirë të Ballkanit për shkak të realizimit të sulmit fizik ndaj lojtarit mysafir.
Ndeshja natyrisht nuk është regjistruar nga FFK-ja.
Portieri Frashëri ka bërë një postim të shkurtër në rrjetet sociale, ku ka njoftuar se vazhdon t’u nënshtrohet kontrollimeve mjekësore.
“Momentalisht jam duke u kontrolluar nga stafi mjekësor i Ballkanit dhe drejtuesve në tërësi, me një përkujdesje shembullore. Sot po kryejmë edhe analiza më të detajuara për të pasur një pasqyrë të qartë të dëmtimit. Shpresoj që çdo gjë të jetë pa problem”, ka shkruar Frashëri.
Nga Ballkani e Gjilani nuk ka pasur ndonjë njoftim të ri. Ndërkohë, në shtabin teknik të klubit therandas nuk kanë pranuar të flasin për rastin që ndodhi në Gjilan.
Ka reaguar Këshilli për luftimin e dukurive negative në sport, që ndër të tjera, ka kërkuar që ndeshjet mos të luhen në stadiume që nuk i plotësojnë kriteret teknike. Ka reaguar edhe Shoqata për Mbrojtjen e të Drejtave të Futbollistëve të Kosovës, që ka shkruar se është e shokuar me incidentin.
Ndërkohë, Prokuroria Themelore në Gjilan ka kërkuar caktimin e masës së paraburgimit ndaj dy të arrestuarve të dyshuar për sulmin ndaj Frashërit.
“Ekziston dyshimi i bazuar se të njëjtit nën pretekstin kinse të festimit të golit të barazimit, hyn në fushën e futbollit, bashkë me një turmë të madhe tifozësh, ku bëheshin veprime huligane dhe gjuajtje sendesh dhe fishekzjarrë. Derisa njëri i pandehur e shtyn dhe e rrëzon për toke, tjetri e godet me shqelm në fytyrë të dëmtuarin. I shkakton lëndime trupore dhe rrezik të përgjithshëm për eskalimin e situatës”, thuhet nga Prokuroria.
© KOHA. Të gjitha të drejtat janë të rezervuara.
