Botërori i atletikës në Serbi: Nuk shfaqet flamuri i Kosovës
Flamuri i Kosovës nuk po shfaqet në Botërorin e atletikës në palestër që po mbahet në Serbi. Po ashtu po mungon edhe në faqen e Federatës Botërore të atletikës.
Gresa Bakraqi ishte atletja e vetme që e përfaqësoi Kosovën në Botërorin në Beograd. Garoi të premten në 1500 metra vrapim,
Por, flamuri i Kosovës nuk ishte shfaqur në monitorin gjigant në “Stark Arena” kur ajo garoi në baterinë e dytë. Po ashtu edhe në uniformë të veten Gresa e kishte të mbuluar flamurin.
Flamuri i Kosovës po ashtu nuk është përfshirë në faqen zyrtare të Federatës botërore të Atletikës te rezultatet e po ashtu edhe te shtetet pjesëmarrëse.
Komiteti Olimpik i Kosovës të premten njoftoi për pjesëmarrjen e Gresa Bakraqit.
“Atletika thyen sërish barrierat – Gresa Bakraqi përfaqësoi Kosovën në Kampionatin Botëror në Beograd”, shkroi KOK-u.
Sipas KOK-ut organizatori dhe Federata Botërore kishin vendosur që shkaku i Kosovës asnjë flamur të mos shfaqet në stadium.
“Gresa u përfaqësua me inicialet KOS në fanellë, njësoj si të gjitha pjesëmarrëset tjera. Shkaku i Kosovës organizatori dhe Federata Ndërkombëtare e Atletikës, kishin vendosur që asnjë flamur i ndonjë shteti pjesëmarrës të mos shfaqet në stadium. Diskriminimi i vetëm erdhi nga regjia serbe, e cila nuk shfaqi flamurin e Kosovës tek emri i garueses, por vetëm shkurtesën KOS, duke dëshmuar edhe një herë se politika serbe ende përzihet në sport, çka për ne është e papranueshme. Në lidhje me këtë, KOK së bashku me Federatën Atletike të Kosovës janë ankuar menjëherë në Federatën Ndërkombëtare të Atletikës dhe në Komitetin Olimpik Ndërkombëtar”, u tha nga KOK-u.
Federata Botërore e atletikës në një përgjigje për “Insidethegames” ka thënë se është angazhuar shumë që të sigurojë pjesëmarrjen e Bakraqit pa tensione.
“Të gjithë janë të vetëdijshëm për situatën politike në këtë rajon. Federata Botërore e Atletikës, Komiteti Organziativ ‘Beograd 2022’ dhe Federata Botërore e Atletikës punuan së bashku për t’u përkujdesur që atletja nga Kosova të garojë pa tensione. Këtu u përfshi pajtimi i të trija palëve që atletja do të paraqitet në Botëror me akronimet e shtetit të saj (KOS)”, thuhet në një deklaratë të Federatës Botërore.
Insidethegames ka kontaktuar edhe Komitetin Olimpik Ndërkombëtar por nuk ka marrë përgjigje ende.
Federata Botërore e Atletikës në janar kishte thënë se njuk parasheh ndonjë problem në lidhje me pjesëmarrjen e Kosovës në Botërorin e atletikës në palestër në Beograd.
“Është kusht për organizimin kështu që nuk parashohim ndonjë problem”, tha atëbotë zëdhënësi i Federatës Botërore.
Komentet e Federatës së Atletikës erdhën pasi që Komiteti Olimpik Ndërkombëtar dërgoi një letër në dhjetor duke paralajmëruar se Serbia nuk duhet të ndalojë sportistë nga shtete tjera që të marrin pjesë në gara të mëdha që i organizon.
Delegacionit të Federatës së Boksit të Kosovës i ishte mohuar hyrja në Serbi në tri raste, duke iu pamundësuar kështu pjesëmarrja në Botërorin e boksit që u mbajt në Beograd në tetor të vitit të kaluar.
Tre boksierëve kosovarë iu mohua pjesëmarrja. Komiteti Olimpik Ndërkombëtar dhe Federata Botërore e Boksit reaguan. KON-i madje kritikoi Federatën Botërore të Boksit se ia dha Serbisë organizimin e Botërorit.
Atletja kosovare Bakraqi të premten doli e 17-a nga 19 garuese në vrapim 1500 metra në Botërorin në Beograd.
Pas garës, Bakraqi, ka rrëfyer përvojën e saj dhe presionet që kishte nga organizatorët.
“Ka qenë emocion i veçantë, të garosh e vetme në stadium, pa ndonjë atlet tjetër nga Kosova, por njëkohësisht ishte nder dhe privilegj që përfaqësova vendin tim në Botërorin, që po mbahet në Serbi. Vazhdimisht organizatori është munduar të ma mbulojë fanellën ku shkruante Kosova. Jam ndier e diskriminuar dhe asesi nuk kam pranuar të garojë, derisa të jem e barabartë me garueset tjera. Në fund, kanë lëshuar pe dhe kam garuar me shkurtesën KOS”, deklaroi Bakraqi për Komitetin Olimpik të Kosovës. “Gazetarët vazhdimisht kërkonin të merrnin intervistë nga unë, kurse sigurimi dhe policia serbe, që më përcllinin në çdo hap nuk i lejonin. Madje, gazetarët serbë më quanin ‘heroina’”, rrëfen ajo, duke shtuar se nuk ka pasur ndonjë problem tjetër gjatë udhëtimit ose qëndrimit në Beograd.
