Alexia Putellas u rrit duke ëndërruar të luante për Barcelonën. Pasi fitoi tripletën – titullin dhe kupën e Spanjës si dhe Ligën së Kampionëve - sezonin e kaluar, statusi i saj si ikonë e futbollit për femra, u konfirmua teksa e fitoi “Topin e Artë” të hënën.
Ndryshe nga skuadra e meshkujve, lojtaret e Barcelonës ishin fantastike edicionin e shkuar me 27-vjeçaren e cila mban emrin “Alexia” në pjesën e pasme të fanellës së saj. Sulmuesja Putellas, e cila mbush 28 vjeç në muajin shkurt, e kaloi fëmijërinë e saj duke udhëtuar me makinë për një orë deri në “Camp Nou”. Ajo bëri udhëtimin për në këtë stadium nga qyteti i lindjes Mollet del Valles, për derbin e qytetit të Barcelonës më 6 janar të vitit 2000.
Pikërisht 21 vjet më vonë ajo u bë lojtarja e parë në epokën moderne që shënoi në stadium, kundër skuadrës së Espanyolit. Emri i saj ishte gdhendur në historinë e klubit që nga ajo ditë, por historia e saj filloi shumë më herët. Ajo filloi të merrej me këtë sport në shkollë, duke luajtur kundër djemve.
“Nëna ime u lodh prej meje që kthehesha në shtëpi me mavijosje në këmbë, kështu që ajo më regjistroi në një klub në mënyrë që të ndaloja së luajturi gjatë pushimit në shkollë”, zbuloi Putellas.
Kështu, me këmbënguljen e prindërve të saj, ajo iu bashkua ekipit Sabadell përpara se të nënshkruante me akademinë e Barçës.
“Këtu gjërat u bënë serioze... Por nuk mund ta imagjinonit, me gjithë nivelin, të siguroni jetesën nga futbolli”, tha ajo.
Pas më pak se një viti ajo u zhvendos te rivali i Barcelonës, Espanyoli. Te Espanyoli, Putellas e bëri debutimin me ekipin e parë në vitin 2010, përpara se të humbiste ndaj Barcelonës në finalen e Copa de la Reina. Më pas ajo u nis në jug për një sezon në klubin me bazë në Valencia, Levante, përpara se të kthehej në “shtëpi” në korrik të vitit 2012, duke nënshkruar kontratën me Barcelonën vetëm dy muaj pas vdekjes së babait të saj.
Në edicionin e saj të parë, Putellas e ndihmoi Barçën të fitonte titullin dhe kupën e Spanjës si dhe u shpall lojtarja më e mirë e edicionit. Ishte në vitin vijues që ajo bëri hapin për në ekipin kombëtar dhe ajo ka vazhduar të luajë në katër turne të mëdhenj me Spanjën, duke regjistruar 92 paraqitje.
Edicioni i kaluar ishte kurorëzim i sukseseve pasi skuadra e saj e fëmijërisë fitoi Primera Divisionin, Copa de la Reinan si dhe Ligën e Kampionëve brenda pak javësh, një arritje historike për futbollin e femrave në Spanjë.
“Ishte një edicion madhështor të cilin e kisha ëndërruar qysh nga fëmijëria”, pranoi Putellas.
Njohja individuale pasoi menjëherë. Ajo u zgjodh lojtarja më e mirë e vitit nga UEFA dhe tani e fitoi edhe “Topin e Artë” në Paris. Kështu Putellas u bë e dyta nga Spanja që e ka fituar “Topin e Artë” pas Luis Suarezit që e kishte rrëmbyer këtë çmim në vitin 1960.
“Jam më se e gëzuar me këtë arritje të madhe në karrierën time. Krahas ëndrrës për të luajtur me fanellën e Barcelonës, e kam realizuar ëndrrën për ta fituar edhe çmimin më të rëndësishëm të futbollit”, thotë Putellas.
© KOHA. Të gjitha të drejtat janë të rezervuara.
